Davila critica a Facenda por exixir elevados impostos a quen tivo que se acoller á dación en pago
A deputada do BNG recolle os casos de persoas que debido a problemas económicos se tiveron que acoller á dación en pago e agora lles chegan reclamacións de abono de impostos por parte da Axencia Tributaria que nalgúns casos chega a 10.000 euros. Facenda alega que estas persoas incorreron nunha ganancia patrimonial, un argumento que Davila critica duramente.
En concreto, Davila fai alusión a varios casos rexistrados en Vigo e en Santiago de Compostela. Reprocha ao Goberno que exixa que ningún dos membros da unidade familiar obteña ingresos ou que a cota da hipoteca sexa superior ao 60% dos ingresos netos obtidos pola familia para quedaren exentos do pago de impostos.
Insensibilidade social dun Goberno que é flexíbel cos grandes defraudadores
Ademáis destas duras exixencias por parte do Goberno está outros dos problemas que reseña a deputada do BNG que é a negativa da maioría dos bancos a asinar o código de boas prácticas que tamén lles evitaría pagar impostos como os sinalados.
A parlamentar do BNG advirte que os casos de solicitudes de dación en pago van ir en aumento e este problema tamén irá en aumento. Lembra ao Goberno que os desafiuzamentos provocaron unha grande movilización social que foi o detonante para que o Goberno aprobase unha lei de medidas para reforzar a proteción hipotecaria, claramente insuficiente.
Davila sinala que o tema hipotecario, a imposibilidade de poder pagar unha hipoteca por falta de recursos económicos é un drama social, e aproveitar un resquicio como a tributación para acorralar economicamente ás persoas que non tiveron máis remedio que se acoller á dación en pago, é verdadeiramente preocupante polo nivel de insensibilidade social que o Goberno demostra. O afán recadador non pode chegar as estes límites practicando a política do pao e a cenoria, afirma.
A deputada do BNG dirixe ao Goberno unha batería de preguntas e lle demanda que rectifique e flexibilice a súa postura.