Congreso: Rosana Pérez critica o intento de Juárez de criminalización do BNG
A deputada do BNG díxolle ao Secretario de Estado de Seguridade que non se está a ter en conta o contexto de graves dificuldades socio-económicas polo que atravesa a poboación, e as autoridades dan as ordes con contundencia e desproporción en casos de manifestacións pacíficas e fundamentadas como é o caso dos afectados por desaloxos das súas vivendas.
Samuel Juárez e o seu intento de criminalización
Ademáis, Rosana Pérez criticou as afirmacións recentes do delegado do Goberno na Galiza, o Señor Samuel Juárez, criticando a súa extralimitación e desproporción á hora de cualificar estas manifestacións, intentando criminalizalos, e incluso intentando criminalizar a formacións políticas como o BNG, usando aquela vella artimaña de relacionarnos co terrorismo.
A deputada do BNG deixou moi claro ao alto cargo de Interior que o BNG sempre rexeitou o terrorismo e lembroulle que a Plataforma de Afectados polas Hipotecas foi galardonada polo Parlamento Europeo co Premio Cidadán Europeo 2013, e desde logo, non cremos que se deba a un comportamento desmedido.
Rosana Pérez fixo alusión concreta ao caso do desafiuzamento en A Coruña de Aurelia Rey, sinalando que se están producindo actuacións por parte da policía que consideramos fóra de lugar, e que se dirixen a impór o medo para que os cidadáns non se manifesten. Unha actuación desmedida que observamos nos desaloxos e tamén noutros casos de cidadáns afectados por abusos bancarios como os preferentistas aos que s elles envían sancións por protestar pola súa situación.
Intervención do Secretario de Estado de Seguridade
Na súa intervención para dar resposta á solicitude de comparecencia do BNG, o Secretario de Estado de Seguridade limitouse a afirmar que a policía nacional ten o deber de cumprir a lei e as sentenzas xudiciais. A policía debe garantir o cumprimento das leis e as ordes xudiciais.
No turno de réplica, o Secretario de Estado sinalou que a actuación policial sempre é profisional e guiada pola necesidade de facer compatíbel o exercicio dos dereitos constitucionais. Negou que existisen instruccións á policía por parte de Interior.
Botou mán dos dados para xustificar as actuacións policiais, e explicou que no ano 2012 se produciron 6.125 concentracións, un incremento dun 40% en relación ao ano anterior. De maneira sorpresiva, afirmou que os funcionarios públicos da policía estiveron sometidos aos lamentábeis recortes e tiveron que traballar máis horas.
Nada dixo en relación ás afirmacións do Delegado do Goberno na Galiza.