Carme Adán : Se as mulleres asasinadas fosen por terrorismo, Feijóo estaría hoxe neste debate
A deputada cualificou de problema de Estado a violencia de xénero e acusou o Goberno galego de ausentarse nun debate sobre unha realidade que xa leva sete mortas en Galiza no ano 2014 porque: O machismo mata
Pleno.-Durante a intervención, a petición propia, do vicepresidente da Xunta, Alfonso Rueda para informar das políticas de igualdade e loita contra a violencia de xénero, a deputada do BNG, Carme Adán fíxolle entrega dunha táboa reivindicativa de 10 medidas contra a violencia machista e demandou do Goberno de Núñez Feijóo abandonar o dobre discurso da lamentación ritual mentres segue reducindo o orzamento en políticas de Igualdade e persoal de atención social.
Mulleres contra a violencia de xénero maniféstanse ante o Parlamento galego
Coincidindo co debate parlamentario, un nutrido grupo de mulleres de diversos colectivos de loita contra a violencia de xénero concentrábase nas inmediacións da Cámara galega portando cadaleitos baixo o lema, NON Á VIOLENCIA MACHISTA e reivindicando máis recursos e medidas.
Pola súa parte, a secretaria de Iniciativas feministas do Bloque Nacionalista Galego, Saleta Chao recalcou, ante os medios de comunicación, que a táboa entregada a Rueda pola deputada do BNG recolle medidas concretas na procura dun plan de coeducación en todos os niveis do ensino, prestación económica durante todo o ano que garanta a independencia das vítimas, dotar de xulgados especializados en violencia de xénero ás cidades galegas, apoiar o asociacionismo contra os malos tratos, a formación especial para o persoal sanitario, un plan de emprego feminino e un protocolo de actuación no tratamento da violencia de xénero nos medios de comunicación.
O Goberno galego ausente do debate contra a violencia de xénero
Xa no debate parlamentario, Adán reiterou en varias ocasións que o machismo mata é só un verdadeiro compromiso dos Gobernos poden impedir que segan producíndose asasinatos de mulleres, asemade, criticou que ante un debate de tal envergadura, sete mulleres asasinadas neste ano, o Goberno galego non asista ao Parlamento. As políticas de igualdade deben ser transversais e non meras declaracións de intencións, a ausencia do Goberno constata a súa falta de interese para resolver a violencia contra as mulleres.
A deputada remarcou que as reformas laborais do Partido popular prexudicaron gravemente o colectivo feminino. O machismo mata reiterou é a desigualdade laboral tamén é trasladada ao fogar. O PP lexisla contra a igualdade sentenciou tras aludir aos recortes sociais que despois recaen sobre ás costas da mulleres, hoxe, dixo, as mulleres son máis pobres que hai cinco anos e en moitas ocasións, a falta de recursos impide que unha muller rompa definitivamente co seu agresor.
Tras a intervención da deputada do PP, Paula Prado, a parlamentaria do BNG lembrou que nin a Lei de apoio á muller embarazada, nin de familia e convivencia ou a da modificación do aborto contan co apoio do BNG porque son sexistas e suman desigualdade entre homes e mulleres.
O machismo mata porque a discriminación está normalizada
Adán asegurou que existen comportamentos que impiden a igualdade entre os que destacou, subvencionar centros que segregan por razón de sexo, que o Sergas negue un contrato a unha muller embarazada ou a publicidade sexista xustificada pola secretaria Xeral de Igualdade, Coruña, guapa, antes morta que sencilla como unha cuestión de gustos.
A nacionalista asegurou que resulta moi difícil reclamar á mocidade non reproducir formas machistas cando series de Televisión, publicidade ou a propia educación camiñan en sentido contrario. Para vostedes a Educación para a cidadanía adoutrinaba porque defendía a igualdade de xénero, os que non adoutrinan, segundo o PP, son os colexios do Opus que segregan os nenos e as nenas, eses educan.
Adán rematou a súa intervención afirmando que o machismo mata porque a discriminación está normalizada.