O BNG volve pedir no Parlamento elaborar un Plan de Saúde Mental
Montse Prado defendeu reforzar a atención sanitaria das persoas afectadas por trastorno mental, cumprir a Lei de dependencia e aumentar as partidas orzamentarias nesta materia
A deputada do BNG, Montse Prado defendeu hoxe, na comisión de sanidade, unha proposición non de lei destinada a priorizar nas políticas sanitarias a saúde mental con estratexias e plans específicos.
O Partido popular rexeitou a proposta nacionalista e afirmou que non hai recortes nesta materia. Tras a resposta do portavoz popular, Alfonso Núñez Centeno, a parlamentaria lembrou que o pasado 10 de outubro celebrouse o Día Mundial da Saúde Mental baixo o lema Vivindo con esquizofrenia no que foi denunciada a escasa atención ao colectivo 75.000 persoas que padecen este trastorno mental grave.
Prado criticou a propaganda que habitualmente utiliza o PP sobre saúde mental cando a realidade, dixo, é que o 88% dos coidados dest@s doentes recae sobre as familias e de maneira principal, sobre as mulleres. Os recortes nos servizos públicos, afirmou, conlevaron un alarmante deterioro na atención especializada e cobertura das necesidades básicas polo que reiterou reforzar as políticas sanitarias neste ámbito.
A deputada reclamou medidas concretas e aumentar as partidas orzamentarias para a atención mental porque é unha responsabilidade da Administración e do Goberno, recalcou.
Por outra parte, tamén pediu cumprir coa lei de dependencia e poñer en marcha un plan de saúde Mental porque Galiza é a única comunidade que carece dunha estratexia nesta materia.
O PP non ten folla de ruta e vai a salto de mata mentres segue pechando centros e trasladando aos doentes a residencias ou a domicilios para seren atendi@s polas súas familias, concluíu.