O BNG traballará arreo para que o 21-O freemos a marea negra de "inxustiza social" do PP

O candidato do BNG á presidencia da Xunta, Francisco Jorquera, presentou en Vigo a candidatura pola provincia de Pontevedra comprometéndose a que o BNG vai traballar arreo, en contacto coa sociedade, para entre todos frear o próximo 21-O a marea negra da inxustiza social, da perversión da democracia e do centralismo que representan as políticas do Partido Popular.

“Esa marea negra -engadiu- vai ser contestada por unha inmensa marea social, marea cívica e popular que da man do BNG vai apostar por unha Galiza máis libre e máis xusta, polo afortalamento do autogoberno e por unha saída social á crise”.

 Da man do BNG o próximo 21-O virá esa contestación social a prol dunha Galiza máis libre e máis xusta

Jorquera fixo estas afirmacións logo de lembrar o exemplo de dignidade colectiva, de sentido de pobo que os galegos e galegas amosaron coa catástrofe do Prestige, coa que combateron non só a marea de chapapote que asolou o País neses días senón tamén a marea de “incompetencia” e “desprezo” por Galiza que amosaron os gobernos do PP, tanto na Xunta como no Estado.

A uns díasde que comece na Coruña o xuízo polo sinistro, o candidato nacionalista puxo este exemplo enriba da mesa convencido de que os tempos actuais requiren dunha grande contestación social como a que se produciu daquela.

Participar en política

Para Jorquera, fronte ás políticas de recortes e a utilización da crise como pretexto da dereita para impor o seu modelo económico e político, é fundamental a mobilización social, exercer a conciencia cidadá e como pobo pero tamén participar en política.

Neste sentido, explicou que a actual situación só se pode resolver dende o ámbito da política, pero sempre e cando se recupere o sentido ético da mesma, “porque política deriva de cidadán, de quen exerce os seus dereitos na praza pública”.

“Hai que participar -dixo- apostando por políticas diferentes, por políticas alternativas como as que defende o BNG; que priorice a economía produtiva, a xeración de emprego, a defensa do autogoberno e uns servizos públicos e socias universais e de calidade, como piares básicos do estado do benestar”.

O candidato do BNG lembrou que o que está en xogo o próximo 21-O é o “modelo de sociedade que queremos para o futuro”; ou o modelo da dereita, moito máis inxusto no económico e no social e recentralizador e antidemocrático no político, ou un modelo que teña os intereses das maoirías sociais como prioridade, e aí están os homes e mulleres do BNG.

Aymerich, número 1 por Pontevedra

Pola súa parte, o cabeza de lista pola provincia de Pontevedra, Carlos Aymerich,insistiu nesta idea e advertiu que o cambio non vai vir nin do PP nin de ningunha forza que non teña a súa cabeza e seu centro de decisión en Galiza, senón do BNG.

O candidato reprochou a Feijóo que non estean os 9.000 postos de traballo que comprometeu co naval e asegurou que malia que o PP se negue a celebrar unha consulta para que os cidadáns decidan se queren as políticas que está a aplicar, “ese referendum vai producirse o próximo 21-O”.

Carme Adán, candidata número 2 pola provincia, aproveitou a súa intervención para reiterar o compromiso do BNG coa xeración de emprego e a súa “insumisión” aos recortes do PP, denunciando os alarmantes dados de paro que se rexistran actualmente na cidade, 33.000 persoas, e na provincia, onde suman 100.000.