O BNG solicita a apertura dunha comisión investigación polas adxudicacións públicas a Villar Mir

• Recadará o apoio a esta iniciativa das outras forzas políticas da Cámara, incluído o PP, tras a imputación do empresario na Operación Lezo

O BNG formaliza no Parlamento a petición de creación dunha comisión de investigación co obxecto de fiscalizar todas as adxudicacións, contratos, autorizacións, concesións e, en xeral, todas as relacións do Grupo Villar Mir co sector público galego, en particular, “o seguimento, análise e investigación do intento de segregación e venda ilegal das centrais dos ríos Xallas e Grande” por parte de Ferroglobe.

A petición do BNG, avanzada pola portavoz nacional, Ana Pontón, na sesión de control a Feijóo, prodúcese despois de que o propietario de Ferroatlántica fose imputado na Operación Lezo, na que a Xustiza investiga unha nova trama de corrupción e suposto financiamento ilegal do PP, cobro de comisións e sobornos, que afecta tanto a altos cargos populares como a destacados empresarios.

A formación nacionalista inicia agora contactos para recadar o apoio das demais forzas políticas para a creación desta comisión de investigación, cuxo debate xa estaría asegurado, en todo caso, a través da presentación dunha proposición non de lei.

O BNG confía no apoio dos outros grupos da Cámara, incluído o do propio PP, despois de que o propio presidente da Xunta declarase no Parlamento que o seu partido non ten “nada que ocultar” en relación á imputación de Villar Mir neste novo suposto caso de financiamento ilegal do PP.

Neste sentido, o Bloque lembra na proposta parlamentaria a “xenerosa” doazón do empresario investigado á Fundación Manuel Fraga, a adxudicación a dedo por 1,3 millóns de euros da xestión dos albergues do Camiño de Santiago á construtora OHL propiedade de Villar Mir, así como outras adxudicacións como a nova liña de atraque no porto vigués de Bouzas por 4,1 millóns de euros ou o contrato para mellorar o calado do Porto de Punta Langosteira por importe de 785.000 euros.

Para o Bloque é imprescindible crear esa comisión en aras da transparencia, acceso á información pública e ao bo goberno, máxime cando está en xogo o emprego industrial en toda a Comarca da Costa da Morte e o interese xeral de Galiza.