O BNG rexistra a Lei para transferir a AP-9 a Galiza
O texto lexislativo, amparado polo artigo 23 do Estatuto de Galiza e 147 da Constitución será debatido no Parlamento galego e Congreso dos deputados, á iniciativa do BNG
As deputadas do BNG, Rosana Pérez e Ana Pontón presentaron hoxe, en sede parlamentar, a Proposición de Lei para transferir a Galiza a autoestrada AP-9 que será debatida proximamente no Parlamento galego e de ser aprobada, continuará o seu tramite no Congreso dos deputados.
AUDASA recada ao día 320.000 euros
Para a deputada Ana Pontón urxe transferir a titularidade da AP-9 a Galiza. A historia desta vía, afirmou, é a historia dunha discriminación e abuso continuado a todos os galegos e galegas dunha autoestrada das máis caras e cos salarios máis baixos.
A AP-9, abondou é un medio máis do Goberno do Estado para que unha empresa privada faga negocio e presentando cada vez un peor servizo, resulta unha mentira que coa centralización Galiza saia gañando, sentenciou.
Dende 1979, AUDASA leva recado en Galiza, 2.257 millóns de euros, desta cifra, 1.700 millóns de euros foron recadados dende o ano 2000, e a maiores dende a súa privatización produciuse un incremento das peaxes e un maior beneficio para unha empresa privada.
No ano 2014, a AP-9 recadou 320.000 euros ao día que saen do peto dos galegos e galegas e se calculamos o que vai recadar ao remate da concesión no 2015, chegará aos 4.000 millóns de euros.
Un auténtico abuso, afirmou, se ademais temos en conta que a construción, conservación e explotación da vía supuxo 1.428 millóns de euros. No 2015, sobrepasaremos en 829 millóns de euros o mantemento da vía o que ven a supoñer, 5 veces máis que o destinado a promoción de emprego ou 17 veces máis que o destinado a investigación universitaria.
É factíbel a transferencia como o foi a A-8 a Euskadi, unha vía moi similar a AP-9, non é un problema legal, é un problema de vontade política, concluíu
Peaxes imposíbeis para usuarias e usuarios
Pola súa parte,a parlamentaria na Cámara baixa, Rosana Pérez lembrou as diversas iniciativas e queixas presentadas polo BNG ante os colapsos de tráfico e o incremento das peaxes da infraestrutura que vertebra o Sur e Norte de Galiza.
Rosana Pérez cualificou de nefasta a xestión do Ministerio de Fomento. As protestas polos continuos colapsos producidos durante o verán obrigaron a titular do Ministerio e os responsábeis do Goberno galego a anunciar naquel momento sancións á concesionaria da AP-9 e mesmo declararon que era hora para a transferencia sen embargo na práctica, denunciou a nacionalista, iso non se traduciu en nada. No Congreso dos deputados o BNG preguntou a Ana Pastor cando se resolvería o expediente de AUDASA e seguimos agardando pola súa resposta.
Suba de peaxes
A AP-9 é a terceira vía máis cara do Estado español, por detrás de dúas vías catalás, e despois de continuadas subidas de peaxe, o Ministerio de Fomento non actuou porque a perda de usuarios e usuarias foi compensada con estas subas.
Rosana Pérez, tras denunciar o deterioro da vía ao longo de Tui a Ferrol e o despido do persoal de cabinas afirmou que a xestión da AP-9 dende Madrid, non ofrece un servizo axeitado ao que sumou o anunciou da obrigatoriedade do transporte pesado a circular polas autoestradas. Neste sentido, dixo, temos serías dúbidas de que a medida sexa legal e sospeitamos que responda á intención do Ministerio de ofrecer unha vía de escape á concesionaria contra a perda de ingresos da AP-9.