O BNG propón mobilizar 800 M para xerar emprego de calidade e rescatar os servizos públicos
A deputada Ana Pontón cualificou as emendas do BNG de antídoto contra as políticas fracasadas de Feijoo e apelou a un cambio de modelo económico que outorgue a Galiza capacidade e instrumentos para enfrontar os retos con estratexia propia
Pleno.- A parlamentaria do BNG, Ana Pontón defendeu unha emenda transversal co fin de mobilizar 800 millóns de euros para destinalos á creación de emprego de calidade, rescatar os servizos públicos e dereitos sociais e unha clara aposta pola lingua e cultura como factor de benestar e desenvolvemento colectivo.
A deputada apelou a un cambio de modelo económico que outorgue a Galiza capacidade real de decisión e instrumentos para poder enfrontar os retos que como pobo temos.
Ana Pontón explicou que as emendas do BNG pretenden ser un antídoto contra a resignación e subordinación das políticas fracasadas e inxustas de Feijóo, está claro, dixo que seis anos de recortes constitúen un sexenio negro que incrementou o paro, máis desigualdade e emigración xuvenil e menos xustiza social e oportunidades.
O Goberno de Feijóo, dixo, teima en repetir os erros presentando uns orzamentos que inciden nos recortes, esquecen a política social e a creación de emprego e están trufados de mentiras e promesas electorais
Fronte a política fracasada, cambios nas políticas de gastos e ingresos
A Xunta, dixo, podería dispor de 240 millóns de euros subindo o tipo que se aplica as rendas de 60.000 a 120.000 euros ao 24,5 e crear un novo tipo para as rendas de 120.000 AO 25,5 co fin de recadar 18 M. Ademais de aplicar unha suba no imposto sobre patrimonio daqueles máis elevados que permitirían recadar 35 millóns máis.
Por outra parte, reclamou dous novos impostos aplicados ás grandes superficies e depósitos bancarios cos que, dixo, poderíamos obter 135 millóns de euros, a maiores.
Pontón lembrou que a proposta do PP que modifica o imposto de sucesións e doazóns supón un regalo de 42 millóns de euros ás rendas máis altas.
Menos cemento e máis innovación, creatividade e dereitos colectivos
A deputada apostou por destinar 78 M máis á Sanidade, 34 a Educación e 52 millóns máis ás políticas sociais aos que engadiu 98 ás políticas de industria e emprego e 65 millóns de euros para un plan de industrialización e fomento de I+D+i e 68 millóns para un plan de emprego destinado a traballadoras e traballadores máis vulnerábeis e retorno da emigración xuvenil.
Ante a preocupante situación do sector naval, a deputada defendeu utilizar 28 M para o centro de reparacións e 24 millóns para medidas de industrialización e transformación no sector lácteo. O BNG tamén destina 16 millóns de euros á dinamización de terras agrarias, banco de terras e pequeno comercio.
Rescate dos servizos públicos e dereitos sociais
Para o BNG, dixo a deputada, a principal preocupación é abordar o grave problema das infraestruturas sanitarias e rescatar o dereito da saúde das persoas.Neste sentido propuxo repoñer persoal médico e enfermería gravemente recortado e destinar 8 M para impulsar medidas de calidade e incluír no calendario vacinal a vacina da meninxite B
Educación
Precisamos repoñer profesorado, apoiar ás familias, gratuidade universal dos libros de texto, medidas que na súa opinión, teñen máis impacto social que o cheque bebé. O BNG introduce 38 millóns para política de bolsas co fin de apoiar as rendas máis baixas para o acceso ás universidade.
Ademais, dixo, son necesarias outras medidas para loitar contra a pobreza destinando 55 M para un Plan de emerxencia social e contra os desafiuzamentos.
Lingua e cultura galega
Unha aposta clara pola nosa lingua e cultura como factor de benestar e desenvolvemento colectivo, e contra unha política antigalega reducida nos orzamentos a unha situación anémica grave. Sobre este ámbito, a deputada propuxo destinar 17 millóns para a promoción do galego, a aplicación real do Plan de Normalización Lingüística e apoio aos sectores culturais do libro, teatro e audiovisual.
Medio Ambiente
Finalmente, a deputada reclamou defender todos aqueles aspectos relacionados co medio ambiente destacando o saneamento das rías, a compostaxe, medios de transporte menos contaminantes e restauración dos espazos naturais protexidos.
Os votos contrarios do Partido popular impediron que prosperaran as emendas nacionalistas