BNG presenta unha campaña con motivo do 8M contra a cousificación e a sexualización da muller

BNG presenta a campaña con motivo do 8M, nesta ocasión centrada na denuncia da cousificación e na sexualización da muller, que persiste a día de hoxe e que mesmo é normalizada cando desde un ente público como TVE se elixe unha canción, -SloMo-, cuxa letra incide en dar unha imaxe estereotipada das mulleres, letra que é utilizado pola formación nacionalista precisamente para facer a súa campaña.

“A pretensión é denunciar que sigue existindo unha cousificación e sexualización dos  corpos das mulleres”, sintetizou a portavoz nacional, Ana Pontón, a quen lle parece especialmente grave que un medio público se sume a normalizar esa concepción e esa imaxe a través dunha letra que a campaña do BNG convida a reescribir.

“Mellor dicir que as mulleres facemos sentir o bun bun dos nosos tambores, que estamos ready-prontas para mudar a realidade das cousas e que somos as que máis problemas monetarios padecemos, nunha fenda salarial que, lonxe de diminuír, incrementouse durante a pandemia. Este é o obxectivo da nosa campaña para este 8M, poñer á vista na discriminación que aínda existe, cada día, vestida de normalidade, coma se nada pasara”, argumentou a líder do Bloque.

É necesario denunciar como o machismo e o patriarcado “oficializan” o seu discurso, consolidando a discriminación das mulleres en todos os ámbitos, nos materiais e tamén nos simbólicos. “No BNG queremos neste 8M bater con forza contra a cousificación das mulleres, contra o machismo que continúa a utilizarnos e a discriminarnos”, recalcou Pontón, e queremos “desenmascara“ ese machismo utilizando “as ferramentas do feminismo”.

Porque as mulleres, recalcou, “non somos cousas, non somos obxectos, nin queremos seguir sendo discriminadas con máis pobreza, máis paro, salarios máis baixos ou máis violencias” e, fronte a todas estas formas de discriminación, “a forza do feminismo e das mulleres” para seguir avanzando, porque “aínda queda moito por facer e por conseguir” para superar “os teitos de cristal e os chans pegañentos”. Pontón tamén puxo o foco na violencia de xénero, esa que se exerce contra as mulleres polo mero feito de selo como forma extrema de discriminación, que hai que combater sempre e en todo lugar.

Desde o BNG convidase a repetir unha gran mobilización na rúa para reclamar unha terra de mulleres poidan ser libres e iguais, con dereitos, con dignidade e con futuro. Con esta campaña, indicou, “queremos denunciar e abrir o debate sobre a cousificación das mulleres e como se ampara, queremos animar a saír as rúas e a organizarnos, estar xuntas este 8M para impulsar o resto do ano as medidas que necesitamos para avanzar cara unha sociedade de iguais”.

Para o Bloque, “a defensa dos dereitos das mulleres forma parte dos nosos cimentos como organización política e non imos permitir nin un paso atrás no que costou tanto esforzo conseguir, ao contrario seguiremos traballando en todos os ámbitos pola igualdade real das mulleres”.