O BNG pide paralizar a construción “irregular” da depuradora de marisco en terreos de Portos de Galiza en Castiñeiras (Ribeira)
O proxecto non conta cos permisos legais vixentes e sitúase ao borde do litoral, espazo en proceso de rexeneración ambiental
Montse Prado critica que a Presidenta de Portos de Galiza non responda en galego ás preguntas formuladas no Parlamento
A parlamentaria do BNG, Montse Prado formulou hoxe unha pregunta, na Comisión de Pesca, relativa á construción dunha depuradora de marisco en terreos de Portos de Galiza e no ámbito de Costas do Estado co “suposto visto bo de Portos e Costas”.
A parlamentaria asegurou que a depuradora, dunha empresa privada, e situada en Castiñeiras, Ribeira está causando alarma entre a veciñanza pola construción no porto e sobre todo por “unha obra no borde do litoral” que non conta coa licencia municipal preceptiva e polo tanto está incorrendo nunha “ilegalidade”.
Tras a resposta da presidenta de Portos de Galiza, Prado recriminou a Susana Lenguas que non utilice o galego nas súas respostas, cuestión sobre a que a titular de portos declinou pronunciarse.
Na súa intervención, Prado mostrou diversas fotografías para constatar a envergadura das obras e negar as afirmacións de Lenguas sobre a falta de impacto ambiental da depuradora. Confirme hoxe, si Portos de Galiza vai continuar coa depuradora, algo que os veciños e veciñas reclaman porque non teñen ningún tipo de información a pesar de recoller centos de sinaturas opoñéndose a esta instalación.
“A depuradora será instalada nunha zona de fraxilidade paisaxística” e súa localización lindeira coa liña costeira sitúase nun lugar en proceso de restauración e rexeneración ambiental para uso público. Ademais, engadiu, está rodeada de espazos naturais como o parque das Illas Atlánticas e o complexo húmido de Corrubedo, explicou.
No proxecto, engadiu a nacionalista, non se prevé a evacuación das augas residuais e no lugar non existe ningunha conexión á rede pública polo que o lavado de moluscos e tráfico de vehículos incidirán moi negativamente no medioambiente.
A deputada cualificou de “inxustificables” as explicacións da Presidenta de Portos e lembrou que o concello de Ribeira aprobou unha resolución sobre o “incumprimento da lexislación urbanística vixente”. Instrumentos legais e informes negativos hai dabondo para que Portos de Galiza “paralice esta actuación”. Contan vostedes, recalcou Prado, coa “oposición dunha veciñanza que rexeita a utilización do peirao e a praia de Castiñeiras para unha depuradora de marisco no borde do litoral”, polo que volveu reclamar a “paralización da obra”