O BNG pide a dimisión de Rocio Mosquera ante o colapso nos servizos de Urxencias
Montse Prado: " È indecente acusar á poboación do caos na Sanidade".A nacionalista volveu pedir hoxe a dimisión de Rocio Mosquera pola alarma e deficiencias na asistencia sanitaria
A deputada do BNG, Montse Prado volveu pedir hoxe a dimisión ou cese da conselleira de Sanidade, Rocio Mosquera ante o caos na asistencia sanitaria detectado estes días provocado polos recortes de medios humanos e materiais para atender a doentes con gripe.
Montse Prado considerou que Galiza vive unha alarma nos servizos de urxencias ante o brote de gripe, é obvio, explicou que os brotes non se poden evitar pero a xestión pode ser diferente á realizada polo Partido popular.
A parlamentaria loubou o traballo d@s profesionais da sanidade que, están a salvar a situación e volveu cargar contra as intencións do Partido popular derivando doentes á sanidade privada a través do peche de recursos para a sanidade pública. Demandamos de Núñez Feijóo que cese a conselleira porque a estas alturas xa non sabemos que máis ten que pasar para que o presidente tome esa decisión.
O persoal sanitario presenta denuncias ante a Xustiza
Prado reclamou un cambio de rumbo na xestión da sanidade pública galega como tamén reclama o persoal sanitario, tanto en manifestacións multitudinarias e denuncias como a presentada, hoxe mesmo, ante a Fiscalía pola Xunta de Persoal da Coruña por posíbeis danos aos doentes.
"Con menos non se pode facer máis"
A redución do 6% do persoal, unha rebaixa do orzamento do 12%, e o peche de 300 camas provocan, afirmou, os colapsos de todos os servizos de Urxencias en Galiza por moito que o tenten minimizar dende Sanidade. Ese mantra do PP con menos facemos máis contradicese cos pacientes en padiolas e cadeiras nos corredores dos hospitais, amoreados nas salas de espera e agardando horas para ser atendidas e trasladados á planta.
A nacionalista salientou o estres dos profesionais e doentes, a conselleira pode seguir defendendo que a calidade asistencial é a mesma pero todos e todas sabemos que con menos non se pode facer máis. Nesta liña, engadiu, todos os días chegan queixas dos doentes e dos profesionais da sanidade. Hai falta de intimidade e confidencialidade, non de confortabilidade como apuntou a conselleira. Resulta indecente e inhumano tratar así as persoas, recalcou.
O BNG pide un protocolo ante os picos de gripe
A previsión dos brotes de gripe debe contar cun protocolo que determine como facerlle fronte.Dende o BNG pedimos nas nosas iniciativas inicialo co fin de determinar as datas e instrumentos necesarios para combater os picos desta doenza. A solución, dixo, non é unha vacinación masiva, a solución é reforzar a atención primaria, diminuír as listas de espera e abrir as unidades de hospitalización ademais de: dimensionar as plantillas, eliminar a taxa de reposición, que supuxo a perda de 3.000 profesionais en catro anos, e abandonar a mentira do Partido popular de que con menos fai máis.
Finalmente, a parlamentaria anunciou que o BNG pedirá explicacións das actuacións realizadas por Sanidade para evitar o colapso sanitario.