O BNG pide unha Comisión de Investigación para aclarar a situación económica de Pescanova
Francisco Jorquera e Carme Adán presentan unha Proposición non de lei que insta ao Goberno a actuar para manter os postos de traballo, viabilidade e centros de decisión en Galiza do grupo empresarial
O portavoz do grupo Parlamentario do BNG, Francisco Jorquera e a portavoz de Industria, Carme Adán presentaron hoxe, en rolda de prensa, unha Proposición non de lei destinada a constituír unha Comisión de Investigación sobre o estado financeiro de Pescanova e o uso realizado das axudas públicas recibidas polo Goberno galego.
A iniciativa nacionalista tamén reclama un compromiso do Goberno galego para garantir o mantemento todos os postos de traballo, un plan de viabilidade e a galeguidade da empresa.
Os parlamentarios do BNG propoñen a participación pública na xestión do capital de Pescanova.
Feijóo debe gobernar para evitar a primavera negra na industria galega
Na súa intervención, a deputada Carme Adán criticou a actitude de Núñez Feijóo ante a situación dunha empresa sistémica en Galiza, o Presidente da Xunta, afirmou, é incapaz de xestionar os graves problemas que temos en Galiza e a Xunta continúa de costas sen aportar ningunha política alternativa para resolvelos.
Adán criticou o silencio de Feijóo ante a situación da empresa así como a falta de vontade para buscar unha solución.Neste sentido, defendeu que o Parlamento coñeza en profundidade a situación financeira de Pescanova e das axudas públicas recibidas durante anos polo que pediu a constitución dunha Comisión de investigación que aclare o acontecido.
A parlamentaria tamén reclamou unha xuntanza co comité de empresa e o goberno galego ao fin de establecer un plan de viabilidade con avais do IGAPE e participación pública da empresa.
Carme Adán reiterou que debe ser responsabilidade do Goberno galego analizar as diversas formas que eviten o final da empresa galega e a súa venda a cachos.
Feijóo exerce de xefe de oposición da oposición
O portavoz do grupo parlamentario, Francisco Jorquera coincidiu coa deputada na análise da situación de Pescanova como un novo síntoma do rotundo fracaso das políticas de Feijóo que aboca a Galiza nunha pendente imparable. O problema de Feijóo, dixo, é que elixiu escoller ser o líder da oposición á propia oposición en troques de exercer como Presidente dun goberno.
Jorquera manifestou que a situación de Pescanova situase nas irregulares xestións do seu Presidente, vinculado a Feijóo na campaña das autonómicas do ano 2009 ao que só lle faltou pedir o voto para o Partido popular de maneira pública.
Unha situación económica, engadiu, produto dun proceso de expansión compulsivo e desordenado que se traduciu no desvencellamento da empresa agravado pola perda de institucións financeiras galegas ante a que Feijóo permaneceu mirando para outro lado.
Para o BNG, dixo, a pesar dos grandes erros cometidos por Pescanova, esta empresa continúa sendo unha empresa estratéxica para Galiza que debe ser reflotada para que volva ás súas orixes evitando o seu troceamento.
O portavoz do BNG no Parlamento galego insistiu na necesidade de constituír a Comisión de investigación para clarexar os motivos da actual situación de Pescanova así como a presenza da Xunta , a través de SODIGA, nunha das súas filiais, concluíu.