O BNG pide o cese do Presidente de Sogama por falsificar datos para xustificar a suba do lixo
Ana Pontón denunciou a falta de transparencia, mentiras e ocultación de información do Goberno galego á cidadanía e o Parlamento galego tras contratar un informe con datos falsos para xustificar o incremento no servizo de tratamento do lixo
A deputada do BNG, Ana Pontón pediu hoxe na comisión de Medio ambiente o cese do Presidente de Sogama por realizar informes que falsificaban as contas das previsións contidas no plan de viabilidade co fin de xustificar o incremento do canon do lixo.
Pontón afirmou que a falta de transparencia, mentiras e ocultación de información do Goberno galego é un proceder semellante o da xestión en Sogama coa famosa, coñecida e discutida suba do canon de Sogama. Neste sentido, lembrou que o Partido popular no Parlamento galego xustificou a devandita suba por mor dunhas importantes perdas da empresa que xustificaba a suba do 33, 4% do canon para evitar a súa quebra. Dende o BNG dixemos que era unha medida inxusta e inxustificada e o tempo ven a darnos a razón.
Feijóo, dixo a deputada, gastou 50.000 euros nun informe para certificar unha suba que, pasado o tempo, quedou demostrado non ser real despois de coñecer as contas, sen embargo o Presidente da Xunta e o PP defenderon un discurso para xustificar o incremento que deben pagar os cidadáns polo tratamento do lixo.
Un informe, errado en base aos datos entregados polo Presidente de Sogama como confirmou a propia empresa Pricewatherhouse. Ou ben o titular de Sogama non se enteira ou pretendeu utilizar datos para xustificar a suba. En calquera dos dous casos, afirmou , debe ser cesado.
O BNG pide a devolución das cantidades cobradas indebidamente os concellos
A parlamentaria criticou o silencio de Feijóo, da conselleira e responsábeis de Medio ambiente neste asunto do que dixo, non é inocente e pediu unha rectificación do canon e a devolución das cantidades cobradas indebidamente os concellos.
Sube a luz un 11%, cando o PP dixo que o recibo diminuiría, a gasolina e a máis cara, soben os produtos de alimentación e o custe da vida cada vez e maior mentres os salarios baixan. Esta política do Partido popular non nos parece de recibo igual que a negativa da Xunta de Galiza a negociar os convenios das administracións locais con Sogama, vostedes xogan cos cartos que teñen que pagar os cidadáns e os concellos.
Finalmente, Ana Pontón volveu criticar o actual modelo de tratamento do lixo baseado na incineración en vez da reciclase cun modelo cercano con plantas comarcalizadas, eficiente co medio ambiente e xerador de postos de traballo. Sogama é un modelo fracasado, concluíu.