O BNG insta á Xunta a recorrer a lei de Costas ante o Constitucional
Ana Pontón denuncia a intención do Goberno de consolidar Ence-Elnosa a través da reforma da lei
A portavoz de Ordenación do Territorio e Medio Ambiente do BNG, Ana Pontón presentou hoxe en sede parlamentar, unha Proposición non de lei na que insta ao Goberno galego a presentar un recurso de inconstitucionalidade contra a lei de protección e uso sustentábel do litoral e modificación da lei de Costas.
A nacionalista afirmou ante os medios de comunicación que na actualidade, existen cinco comunidades autónomas-Canarias, Pais Vasco, Cataluña, Andalucía e Austurias- que xa anunciaron a presentación de recurso.
A deputada lembrou que o BNG amosou o seu rexeitamento á reforma da lei por privilexiar intereses privados fronte o carácter público da costa e non albiscar unha solución para o recoñecemento dos núcleos rurais afectados.
Pontón tamén criticou que o Goberno galego utilice a lei co fin de fomentar a especulación e privatización do litoral así como a consolidación de industrias contaminantes como o complexo Ence-Elnosa na ría de Pontevedra.
Por outra parte, censurou o carácter centralizador da lei e a invasión de competencias exclusivas de Galiza en materia de urbanismo e ordenación do litoral.
Paso atrás na protección da costa galega
A parlamentaria cualificou de paso atrás a modificación da lei de Costas, aprobada recentemente, e lembrou que despois de Canarias, Galiza é o territorio que conta con máis quilómetros de Costa de todo o Estado.
Neste sentido, reiterou que a Xunta debe presentar o recurso para defender as competencias galegas e dar resposta aos problemas prolongados no tempo e con graves prexuízos para miles de galegos e galegas.
Ana Pontón asegurou que a reforma da lei resulta regresiva e inxusta porque non recoñece a singularidade galega, vulnera a autonomía local e o principio de igualdade ao establecer tratos diferentes e inxustificados nalgúns núcleos, concluíu.