O BNG empraza a Feijoo a que mova ficha para evitar o espolio do aforro galego
A portavoz do Grupo Parlamentar do BNG, Ana Pontón, instou a Núñez Feijoo a que abandone a súa pasividade cómplice e mova ficha para evitar que, coa reforma financeira anunciada polo goberno de Rajoy, se espolie a Madrid o aforro galego.
Pontón valoraba así o anuncio do ministro Luís de Guindos de crear un Banco Público Estatal coas entidades estatalizadas, nucleado a partir de Bankia, e no que se disolvería tamén Novagalicia Banco.
A parlamentaria nacionalista participou esta mañá na feira de Padrón nun reparto informativo sobre as medidas alternativas que propón o BNG para saír da crise.
Despois de tres anos de austeridade con Feijoo, o resultado é un fracaso
Neste sentido, denunciou que despois de tres anos de políticas de austeridade constátase o seu fracaso, moito máis en Galiza, onde os resultados das políticas de Feijoo son máis paro, que se destrúa máis emprego que na media do estado, recesión e que se teña producido un incremento moi forte das desigualdades sociais.
Na mesma liña, Ana Pontón afirmou que hoxe é un día para escandalizarse, pois vimos de coñecer que o Estado vaille entregar a Bankia máis de 23.000 millóns de euros de fondos públicos. Unha entidade -lembrou- que foi xestionada baixo a tutela de Esperanza Aguirre e do señor Rato despois, e o que deixan detrás de si é un auténtico desastre e un burato que agora pretenden que financiemos con fondos públicos.
O BNG oponse a que se socialicen as perdas da banca
E para a portavoz do Grupo Parlamentar do BNG dende logo cremos que esa non é a vía e subliñou que os recursos públicos deben utilizarse para xerar emprego e benestar e manter os servizos públicos, pero non para socializar as perdas da banca.
Os recursos públicos non se poden utilizar para socializar as perdas da banca
Silencio cómplice de Feijoo ante o espolio do aforro galego
Igualmente, Ana Pontón afirmou que no BNG preocúpanos tamén moito cal vai ser o futuro de Novagalicia Banco, xa que o futuro deseñado por Rajoy e o PP é que o noso aforro pase a formar parte do gran banco público nucleado por Bankia. Unha perspectiva que advertiu suporá un espolio para Galiza e a perda de instrumentos para poder facerlle fronte á crise.
Neste momento a alternativa que defende o BNG é que os fondos que ten o FROB -o Estado- en Novagalicia Banco se transfiran á Xunta para que podamos ter un instrumento financeiro propio.
A este respeito, a portavoz do Grupo Parlamentar do BNG denunciou que o grave é que ante esta situación o señor Feijoo non presenta ningunha iniciativa, mantén unha pasividade cómplice con este deseño. Por iso, afirmou que o BNG emprázao a que mova ficha porque cremos que o que non se pode tolerar é que se espolie o aforro dos galegos e das galegas.
http://youtu.be/IejS-E1cUWQ