O BNG denuncia o peche continúo de servizos na Guarda ao que suma agora a oficina do Instituto social da Mariña

A deputada Montse Prado, acompañada do voceiro municipal, Angel Baz e membros do BNG do concello, mantivo hoxe unha xuntanza con diversas entidades vencelladas ao sector do mar para analizar a actual situación  da oficina do Instituto social da Mariña no concello da Guarda tras a importante redución horaria do servizo.

Actualmente, explica a nacionalista,  o cadro de persoal está   formado por tres persoas  con dúas  prazas vacantes e unha terceira de baixa laboral. O servizo estase a cubrir, engade Prado,  “unha vez a semana” con persoal procedente doutras oficinas poñendo  en grave risco a  súa continuidade  e  lembra que esta situación súmase a desaparición doutros servizos como a Capitanía marítima tras o pasamento do seu titular que pasou de estar operativa todos os días a  un só día cada dúas semanas.

Tras a reunión coa Asociación de Palangreiros, A Confraría de pescadores  e a Organización de palangreiros guardeses, a deputada nacionalista trasladou o apoio do BNG ás demandas das entidades e asegurou que ao igual que os afectados, o BNG non está disposto a asumir “a crónica da morte anunciada” dun servizo que está a crear graves problemas na tramitación administrativa así como a “desprotección” e obriga de incrementar os custes e desprazamentos á cidade de Vigo. A Guarda, é unha vila mariñeira cunha importante flota de baixura, altura e marisqueo e un gran número de veciños e veciñas que  dependen deste servizo para realizar as xestións preceptivas para desenvolver a súa actividade no sector do mar.

Dende o BNG, dixo a parlamentaria,  “exixiremos ao goberno galego e español que actúen para resolver esta situación”. A veciñanza da Guarda, recalcou non pode “perder máis servizos” e sobre todo nun sector xa afectado gravemente por outras dificultades polo que avanzou o apoio e participación do BNG  nas mobilizacións para que o Instituto social da Maríña volva a ofrecer unha atención de calidade aos usuarios e usuarias do servizo.