O BNG defende no Parlamento as reclamacións da Plataforma de afectad@s por Hepatite C
A plataforma reivindica o fármaco que permitirá vivir aos afectad@s
Os grupos parlamentarios do BNG,PSdeG, AGE e Mixto mantiveron hoxe unha reunión coa Plataforma galega de afectados por hepatite C na que mostraron o seu apoio á reclamación dun tratamento con fármacos de nova xeración para tod@s os enferm@s afectados por esta doenza e asumiron a Proposición non de lei con esta reclamación.
A deputada e portavoz de sanidade do BNG, Montse Prado asegurou que esta forza política permanecerá ao lado dos afectad@s para que sexan atendidos. Non podemos permitir, reiterou, que habendo unha medicación axeitada sexa negado o seu acceso.
Criterios médicos fronte a criterios economicistas
Asemade, recalcou que é necesario que primen os criterios médicos e non económicos polo que pediu un cambio de política que posibilite o tratamento no sistema público.
Montse Prado confirmou o apoio do BNG ás reivindicacións da plataforma reflectidas na Proposición non de lei que será presentada por esta forza nacionalista no Parlamento galego para instar ao Goberno do Estado e á Xunta de Galiza a garantir ás novas terapias contra a Hepatite C (VHC) e tomar medidas que permitan dispensar nas farmacias hospitalarias as medicacións prescritas polos facultativos do Servizo Galego de Saúde de maneira inmediata.
A plataforma reivindica o fármaco que permitirá vivir aos afectados
Pola súa parte, Quique Costas, portavoz da plataforma denunciou que tras a aprobación do Sofosbuvir, un antiviral de acción directa e de eficacia recoñecida nun 95% sobre o VHC a principios do ano 2014, a ex-ministra Mato anunciou que o Ministerio acadaría un acordo co fabricante para que en outubro os médicos puideran dispoñer do medicamento en toda España. A día de hoxe, dixo, Costas, seguimos escoitando anuncios, catro en dúas semanas cando estamos a falar de curar ou deixar morrer á xente.
Neste sentido, lembrou o novo anuncio do ministro de Sanidade Alfonso Alonso de crear unha Comisión de expertos para elaborar un plan estratéxico nacional contra a Hepatite C que o portavoz da plataforma cualificou de anuncio opaco para despistar a opinión pública. Nós, non contamos con tempo para agardar polas conclusión da comisión. Esiximos que nos curen Xa.
O tempo que nos pide o Goberno , non o temos
Nesta mesma liña pronunciouse Xulia Alonso, membro da Plataforma que defendeu un sistema sanitario público que pagamos todos e todas cos nosos impostos.
Alonso pediu respecto ao Goberno do Estado para @s afectados por esta doenza e defendeu o traballo da plataforma como resposta á inactividade do Goberno. O tempo que nos piden, concluíu, non o temos.