O BNG defende a corresponsabilidade dentro e fora do fogar
Baixo o principio de igualdade, a deputada do BNG, Carme Adán reclamou un reparto equitativo entre homes e mulleres nas tarefas do coidado e reprodutivas e desenvolver campañas de sensibilización para fomentar a corresponsabilidade no ámbito familiar.
No Día Internacional contra a violencia de xénero, o Partido popular vota en contra da toma de consideración da lei de Corresponsabilidade defendida pola deputada do BNG, Carme Adán, destinada a un reparto equitativo entre homes e mulleres das tarefas e coidado, dentro e fira do fogar.
A parlamentaria comezou asegurando que sete de cada dez empresas novas en Galiza foron fundadas por homes, 60.000 mozas galegas emigraron dende o inicio da crise, mulleres cun traballo remunerado dedican unha media de máis de dúas horas máis que os homes a tarefas domésticas todos os días, aumenta a parcialidade e temporalidade da muller traballadora e a crise dispara a exclusión social entre as mulleres galegas, as excedencias para coidado de menores e dependentes recaen no 95% en mans de mulleres e as mulleres galegas gañan unha media de 5.000 euros menos que os homes, todo isto,dixo, son titulares extraídos da prensa deste mesmo ano.
A día de hoxe, engadiu, o reparto dos espazos públicos e privados entre homes e mulleres segue sendo desigual e referiuse concretamente ao espazo económico ilustrando cunha fotografía, unha xuntanza do Consello empresarial para a competitividade integrada só por homes. Esta é a realidade, un total esquecemento das mulleres nos foros de decisión.
Sobre os tempos lembrou que as mulleres galegas dedican unha media de 4 a 7 horas ao día ao traballo doméstico fronte as 2, ou 2.30hs dos homes, ese uso dos tempos non é equilibrado nin simétrico.
As políticas de Igualdade non están de moda
A parlamentaria denunciou a falta de recoñecemento social das mulleres e utilizou como mostra as demandas nunha recente pancarta de mulleres ciclistas reclamando igualdade, tanto nos premios económicos como na organización das carreiras. Para Adán, esta é outra mostra da falta de visibilidade das mulleres e os seus dereitos porque as políticas de Igualdade, afirmou, non están de moda nin na axenda política quizais porque nun momento de contracción económica queren que o mundo do fogar sexa gratuíto e de mulleres e por iso cada día fálase menos de conciliación e corresponsabilidade.
Pola súa parte, a portavoz do Partido popular,Rosa Oubiña anunciou o voto contrario á iniciativa nacionalista por considerar que a Lei de corresponsabilidade non é necesaria e non aporta nada novo.
Adán recomenda aos deputados do PP que lean
Na réplica, Adán lamentou as palabras de Oubiña e recomendou ao grupo popular ler o informe de Impacto de xénero da Secretaría xeral de Igualdade e tamén a obra de Miguel Lorente, Tú haz la comida que yo cuelgo los cuadros.
Adán concluíu a súa intervención reivindicando unha política en nome feminino.