O BNG chama "farsante" a Feijóo pola súa postura ante o galego
A deputada, Ana Pontón cualifica de nova farsa que o Presidente da Xunta tente convencernos da boa saúde da lingua galega cando día a día pérdense galegofalantes e a política lingüística da Xunta ataca o seu uso
A parlamentaria e portavoz de Política Lingüística do BNG, Ana Pontón cualificou hoxe de nova farsa as declaración de Núñez Feijóo relativas ao bo momento da lingua galega e unha constatación da falta de vontade para mudar a política da Xunta contra o noso idioma.
Pontón acusou de cinismo o presidente da Xunta e ser o máximo responsábel do desastre e negro futuro do galego. Na súa opinión, resulta inconcibíbel que mentres as enquisas e os expertos falan dun problema gravísimo para a nosa lingua, o Presidente da Xunta pretenda facernos ver que está no seu mellor momento. As afirmacións de Feijóo son un insulto á verdade é un exercicio de propaganda inútil.
O BNG volve a pedir como mostra de vontade política derrogar o Decreto do plurilinguismo
A deputada advirte que o Decreto do plurilinguismo colide frontalmente co uso do galego e o goberno vai seguir mantendo esa vergoña. Agora, explica a deputada, presentase unha proba de lume para a Xunta coa posibilidade de demostrar a súa vontade para mudar a política contra o galego. A propia Xustiza, engade Pontón, destacou o carácter ilegal do decreto. As organizacións sindicais do ensino tamén o rexeitaron ao igual que as AMPAS, movementos de renovación pedagóxica, miles de persoa nas rúas, Plataforma Queremos Galego, o Consello da Cultura Galega e recentemente a Real Academia Galega.
Para a deputada non é de recibo excluír o ensino nas políticas en defensa da linga porque resulta un ámbito relevante das políticas de normalización do idioma. Feijóo pretende manter a marxinación da lingua galega coa súa exclusión do ensino infantil, o Decreto lembrou, case varreu o galego do ensino infantil nas cidades.
Feijóo en clave electoral
Pontón acusa a Feijóo de dinamitar os acordos do Plan de Normalización da Lingua, e agora ante a grande indignación social demostrada o pasado domingo na multitudinaria manifestación en Santiago de Compostela, e a proximidade dun novo proceso electoral, quere evitar con falsas declaracións, unha sangría de votos no Partido popular.
Para a nacionalista, o presidente non ten credibilidade, incumpriu o Plan Xeral, a lei de Normalización e a Carta Europea das Linguas Rexionais.
Estamos ante unha situación dramática e urxe corrixir as políticas que marxinan a lingua galega. O anunciou de Feijóo parecese a unha tea de araña na quere enmarañarnos un ano ou dous coa elaboración de novas medidas pero segue aplicando unha política lingüicida. Para a nacionalista, se Feijóo pretende darlle credibilidade ás ofertas de acordos, o xesto agardado pola inmensa maioría de galegos e galegas é derrogar o decreto do plurilingüismo e aplicar as medidas acordadas hai dez anos e vixentes aínda a día de hoxe no Plan Xeral de Política Lingüística.