BNG acusa a CRTVG de potenciar o castelán e discriminar a mulleres profesionais nos espazos de opinión

A deputada do BNG por Ourense e portavoz na comisión de Control da Corporación Radio Televisión de Galiza, María Albert acusou ao director Xeral da CRTVG, Alfonso Sánchez Izquierdo de potenciar o español e discriminar a mulleres profesionais, de recoñecido prestixio, nos espazos de opinión.

Os espazos de opinión, dixo, serven para construír opinión e non é “inocente” a escolla dos tertulianos que opinan de igual maneira e coa mesma ideoloxía.

Para a deputada, as tertulias da radio e televisión galegas abordan de maneira sistemática a “axenda única de Madrid, o argumentario do Partido popular e a promoción de Rueda e Feijóo” e  “non reflicten a pluralidade dun país en evolución”.  Non nos referimos só aos comentaristas, dixo Albert, tamén aos opinadores “que crean opinión a través dun discurso único”.

Elección discriminatoria  de  profesionais nos espazos de opinión

Ante a falta de  presenza de mulleres profesionais nos espazos de opinión, a nacionalista reiterou que nos faladoiros é escasa a pesar de que existen “moitas mulleres xornalistas”, de recoñecido prestixio, e cunha grande capacidade para poder emitir as súas análises en galego pero vostedes, recalcou, prefiren ter nas tertulias a “unha persoa de VOX”. Con este proceder “ocultan a realidade do noso país e recórdolle que VOX non ten representación política  en Galiza”, remarcou.

Por outra banda, no transcurso da pregunta parlamentaria do BNG, criticou a “falta de calidade na utilización do idioma galego por parte dos  tertulianos” e insistiu en que cada vez  nótase máis  a  “grande presenza do castelán” nos opinadores.

Os medios de información, explicou a deputada,  non só informan ou entreteñen, tamén transmiten símbolos, representacións, constrúen referentes sociais e contribúen á construción da identidade. É a través deles, boa parte da cidadanía forma opinión sobre os temas de actualidade.

Tras a intervención do titular da CRTVG que xustificou que un comentarista utilice de “maneira deliberada” o castelán nas súas intervencións, a deputada do BNG recriminou a Sánchez Izquierdo a súa prepotencia e falta de pudor para afirmar que o realmente importante deste opinador  é o seu prestixio como xornalista  e non a lingua que utilice.

Ademais, a parlamentaria recriminou á dirección da CRTVG a ocultación da información parlamentaria nos servizos informativos, tertulias e espazos de opinión.

251 Venres Negros e novas mobilizacións contra a manipulación na CRTVG

Albert explicou que as preguntas parlamentarias do BNG trasladadas a comisión celebrada hoxe no Parlamento galego  proceden dunha comisión de 10 días que por unha repentina afonía do director Xeral da CRTVG non se pudo celebrar. Curiosamente, explicou a deputada, había unha convocatoria de unha folga de 24 horas dos traballadores e traballadoras do ente público contra a vulneracións dos seus dereitos laborais, persecución e manipulación informativa, dous días despois da celebración da comisión. “Non queremos pensar mal, pero todo indica que vostede quería enfríar as repercusións do paro convocado polo persoal”.

Por moito que o intente, insistiu a nacionalista “non van a calar as protestas dos traballadores e traballadoras” e tampouco poden ocultar que levan “251 Venres negros” con reivindicacións que o BNG apoia e  apoiaremos nas  próximas mobilizacións de Defende a galega.

“Non boten máis leña ao lume, non afundan máis ao persoal”, poñan o freo e recapaciten. Hai un mal estar social da deriva na que vostedes meteron aos medios públicos e resulta “unha falta de respecto” aos traballadores e traballadoras que sigan negando a realidade e a existencia dun conflito. Vostedes, con tal de “manter o control pasan por riba da calidade dos medios” e mentres tanto, o persoal vive unha situación límite na Radio e Televisión galegas.

Até o Colexio de Xornalistas, engadiu a deputada do BNG, emitiu un comunicado denunciando a manipulación informativa e persecución de profesionais nos medios públicos. Están represaliando a traballadores movéndoos de programas e espazos informativos, unha medida que  empeora a calidade das informacións e do propio medio co fin de “castigar a un ou unha  traballadora”.

“Non sigan falseando a realidade”, e rectifiquen, sentenciou.

 A deputada concluíu a súa intervención anunciando que o BNG seguirá apoiando todas as reivindicacións dos traballadores e traballadoras e denunciará no Parlamento galego todos os casos de persecución e vulneración dos seus dereitos.