O Bloque apoia a mobilización convocada pola CIG de apoio ao sector naval
O Bloque e a CIG celebraron unha reunión conxunta para continuar valorando a situación económica, social e laboral do país, destacou o portavoz nacional do Bloque tras o encontro. Xavier Vence destacou a coincidencia en boa medida entre BNG e CIG do diagnóstico a respecto da situación catastrófica cara a que imos camiñando, tanto na dinámica do sistema produtivo, co peche de empresas continuado, e a falta dun sistema financeiro propio e comprometido co tecido empresarial e económico de Galiza.
É necesario que o país reaccione e tanto desde o BNG como da CIG estamos plenamente de acordo en mover o país, mover á cidadanía en toda unha campaña de mobilizacións para reclamar outro tipo de políticas económicas, industriais e financeiras, destacou Vence.
O portavoz nacionalista expresou o apoio do BNG ás mobilizacións convocadas a nivel europeo para o 1 de xuño en resposta ás políticas da troika, así como á folga convocada na comarca de Ferrolterra o 12 de xuño para reclamar unha solución ao sector naval. Defendeu a necesidade de mudar radicalmente as políticas, tanto as que impulsa a Unión Europea, como o goberno central e a Xunta de Galiza para conseguir que Ferrol teña carga de traballo e liberdade para producir naval.
Vence precisou que o plan de traballo marcado hoxe polo BNG ten como obxectivo a mobilización doutras comarcas do país para dar unha resposta desde todos os sectores sociais e conseguir que muden as políticas que aplica o Partido Popular.
Fracaso das políticas neoliberais
Desde o BNG cremos que despois de 5 anos de crise e do fracaso das políticas neoliberais importadas pola troika é necesario erguer alternativas, subliñou Vence, quen destacou que desde o Bloque estamos comprometidos co país a presentar alternativas concretas.
Neste sentido, Vence asegurou que as alternativas concretas do Bloque baséanse nos nosos recursos, do noso aforro, construíndo un sistema financeiro propio, que consideramos que debería ser a banca pública galega. Considerou que estes son elementos indispensables para frear o deterioro da economía produtiva e saír realmente da crise.
Por outro lado, o secretario xeral da CIG, Suso Seixo, valorou positivamente a campaña do BNG en defensa dun sector financeiro galego que realmente responda aos intereses e a problemática de Galiza, así como o apoio ao tecido produtivo galego. Perécenos fundamental no momento no que estamos, apuntou ao respecto, en tanto que unha das grandes preocupación do sindicato nacionalista estriba precisamente na destrución do tecido produtivo e do emprego.