O barquiño da armada para Ferrol e o megagaseiro para Cádiz, así defende Feijóo ao naval galego
Diante de Navantia-Ferrol e acompañada polo portavoz municipal do BNG, Iván Rivas, e de membros do comité de empresa, Ana Miranda denunciou que o gaseiro que se construirá en Cádiz suporá 5 millóns de horas de traballo fronte ao millón de horas que supón a patrulleira adxudicada a Ferrol, que só dará traballo a un terzo da plantilla actual do estaleiro, sen sopoñer emprego algún para os máis de 5.000 traballadores e traballadoras das empresas auxiliares que están no paro neste momento. A candidata nacionalista lembrou que na comarca ferrolá hai 20.000 persoas no paro, cunha taxa de desemprego do 32%, superior á media galega.
Por iso, a candidata do Bloque acusou a Feijóo de cómplice de Rajoy e Almunia, por estar tapando a política de desmantelamento do sector naval de Ferrol que está aplicando a UE e o Goberno do Estado e cualificou de cosmética electoral o anuncio feito o pasado mércores en Ferrol por parte do presidente da Xunta. Feijóo sabía que o gaseiro marchaba para Cádiz quixo tapalo co anuncio dun barquiño, afirmou a cabeza de lista do BNG ao Parlamento Europeo, que explicou que o encargo feito a Ferrol é o barco máis pequeno do catálogo da Armada
Almunia non tomou aínda decisión algunha en relación ao dique flotante
A cabeza de lista do BNG afirmou que a patrulleira anunciada por Feijóo para Ferrol non resolve o problema de falta de carga de traballo dos estaleiros da ría de Ferrol e reclamou novamente que o futuro do sector naval en Ferrol pasa polo levantamento inmediato do veto á construción civil, a posta en marcha dun plan de actividade e a construción do dique flotante que, denunciou, está varado en terra en Madrid por culpa de Rajoy e Feijóo, dixo.
Neste sentido, Ana Miranda deu a coñecer a resposta que a semana pasada deu a Comisión Europea a unha iniciativa presentada polo BNG en Bruxelas na que o comisario da Competencia, Joaquín Almunia, di que a Comisión Europea non ten tomado unha decisión sobre a construción do dique flotante porque o Estado español non ten feito unha petición oficial neste sentido. A Comisión confirma nesta resposta ao BNG que as autoridades españolas enviaron unha mera consulta informal e non unha notificación oficial á Unión Europea.
Quen ten que pedir o levantamento do veto?
O naval de Ferrol precisa de carga de traballo real e con perspectivas de futuro. A perspectiva ten que ser a construción naval civil sen restricións, xa que abonarse en exclusiva ao nicho militar, dadas limitacións dos orzamentos públicos neste momento, non garante o futuro, defendeu Ana Miranda.
Por iso, o BNG demanda o levantamento inmediato do veto que establece a UE para o estaleiro de Fene, recuperándoo para a construción naval civil. En caso de non acadarse anticipadamente, o BNG estará vixiante con que se levante o veto na data en que está estipulado, de xeito que o 1 de xaneiro de 2015, o estaleiro poida construír buques civís. E acompañar o levantamento do veto dun programa de axudas públicas que implique investimentos e actualización tecnolóxica do estaleiro precisos para poñelo en plena operatividade e facelo competitivo.
En relación ao levantamento do veto, Ana Miranda tamén deu a coñecer hoxe en Ferrol que o BNG ven de presentar tamén no Parlamento Europeo unha batería de preguntas na que quere saber se o levantamento do veto en 2015 vai ser automático ou debe ser solicitado e quen debe solicitalo, se o Estado español ou o sector.
Tratamento xusto para o naval galego
A cabeza de lista do BNG ao Parlamento Europeo reclamou un tratamento xusto para o sector naval galego por parte da Unión Europea. A construción dun barco puntual, por encargo da Armada, no estaleiro de Navantia non resolve o problema estrutural dos estaleiros de Navantia, provocado polo inxusto veto ao que o someteu a Unión Europea durante case 30 anos e que lle impide a construción de buques civís, denunciou Ana Miranda. As políticas acometidas contra o sector naval en varias décadas, aplicadas tanto polo PP como polo PSOE, foron as que arruinaron o sector e a comarca de Ferrol, xa que nestes momentos é a que ten o índice de desemprego máis elevado de Galiza, dixo.
FOTOS: DELMI ÁLVAREZ