Ana Pontón tacha de "burla" a comparecencia do titular de Política Lingüística
Para a deputada, Política Lingüística segue "incumprindo as leis" comparecendo no Parlamento sen remitir previamente o informe sobre as previsións e custos das accións para fomentar os lazos culturais e lingüísticos de Galiza co mundo da lusofonía e o ensino do portugués en Galiza.
A deputada do BNG, Ana Pontón acusou hoxe ao Secretario de Política Lingüística, Valentín García de non cumprir a lei aprobada no Parlamento para a ensinanza do portugués no ámbito educativo de Galiza como materia estranxeira e promover as relacións estratéxicas de Galiza co mundo da lusofonía.
Pontón acusa a Valentín García de falta de credibilidade
Tras a comparecencia de García para informar das accións de fomento dos lazos culturais e lingüísticos de Galiza co mundo da lusofonía, a parlamentaria acusou ao secretario xeral de falta de credibilidade e de vivir unha farsa na que está convertido un goberno que cre que a mellor maneira de gobernar é a través de titulares e mentiras.
Tense creado no Goberno galego algún órgano que coordine o impulso desta lei nas súas diferentes vertentes, preguntou Pontón porque esa é a primeira obriga dun Goberno responsábel.
Qué fixo a Xunta para impulsar o idioma portugués?
Fixo a Xunta de Galiza algunha campaña para que a poboación galega sexa consciente de que pode optar ao ensino de lingua portuguesa e cales son as vantaxes para o alumnado galego con esa opción?. Onde está, en que medios de comunicación e con que resultado, preguntou a deputada porque a realidade, afirmou, é que existen 7 veces menos alumnado en Galiza que en Estremadura e recalcou que en Estremadura existe unha lei de impulso da lingua portuguesa cun incremento do 35% do alumnado no ensino primario e secundario, mentres en Galiza só existen centros con profesorado intentando impulsar o ensino do portugués.
Por outra parte, Ana Pontón tamén criticou a falta de estratexia económica relacionada coa externalización da cultura galega que segue baixando sobre todo coas empresas culturais. A deputada aludiu á recepción das televisións portuguesas e da TVG en Portugal das que dixo, ningún avance a pesar das reclamacións do BNG no Parlamento galego e no Congreso dos deputados.
Ana Pontón pide un compromiso de Política Lingüística para que o galego non retroceda no Bierzo
Finalmente, e aínda que no formaba parte da orde do día da comisión, a parlamentaria do BNG denunciou a situación do ensino galego no Bierzo e os pasos a trás da LOMCE na configuración do estatus do galego. É inadmisible censurou a deputada, que o galego fique reducido a unha optativa fora do horario lectivo polo que pediu ao Secretario de Política Lingüística un compromiso para que o galego non retroceda no Bierzo.Unha Lei non pode pisotear dereitos fundamentais como estudar galego tamén no Bierzo.
A parlamentaria concluíu a súa intervención lamentando que o secretario xeral non respondera a ningunha das preguntas formuladas e a falta de compromiso sobre a situación do galego no Bierzo.