Ana Pontón: “O resultado municipal do BNG en Lugo evidencia que estamos ante un cambio político en Galiza”

No encontro co grupo municipal de Lugo para abordar as liñas políticas municipais dos  vindeiros catro anos, a portavoz nacional do BNG,  Ana Pontón afirmou que o BNG quere “converter Lugo no motor da Galiza interior”.

Acompañada polo portavoz municipal, Rubén Arroxo, as concelleiras, Maite Ferreiro e Cristina López e os concelleiros, Felipe Rivas e Alexandre Penas, e tras felicitar ao grupo municipal nacionalista polos resultados do 26M, Pontón destacou o grande apoio recibido por todas as persoas que compartían co BNG a necesidade de darlle “un cambio a Lugo” que anticipa, dixo, “un cambio en Galiza no que o BNG será unha forza central”

Neste sentido, recalcou  que o BNG é unha forza política a alza que se transformará nun maior apoio “nas vindeiras eleccións galegas de 2020”. Temos un reto por diante e imos coa responsabilidade de poñer en marcha “un cambio real” para deixar atrás as políticas lesivas do Partido popular e de Feixóo.

Un cambio, reiterou  “en clave galega” polo que  traballaremos “coa man tendida” para ser o catalizador político que precisa o noso país.

DEPUTACIÓNS AO SERVIZO DOS CONCELLOS

A líder nacionalista afirmou que o BNG “abriu unha nova etapa no concello de Lugo” que abordará con “humildade, ilusión e vontade” e cremos que esa nova etapa tamén debe abrirse na Deputación. Neste sentido, explicou que é necesario falar do futuro e avogou por que se inicien conversas entre o PSdG-PSOE e o BNG  para definir “as liñas estratéxicas de futuros acordos”. Dende o BNG temos moi claro, explicou, que o importante non son os nomes dos deputados e deputadas provinciais  que ocuparán as institucións  porque o relevante é que queremos facer cunhas deputacións “anacrónicas e que non responden á realidade galega”. Dende o BNG a nosa postura sempre foi a súa eliminación pero mentres non desaparezan estaremos aí para que respondan a “un funcionamento con criterios democráticos e transparencia.” Que non sexan usadas con interese partidista e sexan utilizadas para apoiar aos concellos e aos servizos básicos dos cidadáns aos que teñen dereito”. Nesta liña, dende o BNG apostamos por afondar no baleirado de funcións impropias, democratizar as deputacións, que no  reparto dos fondos públicos non prime o amiguismo e galeguizar estas institucións, tanto no funcionamento interno como no papel co fin de “reforzar a nosa lingua e cultura”.

En Lugo hai que “abrir un tempo novo na Deputación porque foi un exemplo do que non debe ser unha institución e o papel do Bloque será claro, devolver o respecto interno no funcionamento da institución baixo criterios moi diferentes dos que vivimos no pasado mandato.

A preguntas dos xornalistas sobre os pactos no concello e deputación de Ourense, Pontón acusou a Feixóo de “dicir unha cousa e facer a contraria”  e a evidencia  que o Partido popular agora avala a un candidato do que en campaña dicía que “sería letal” para Ourense. Feixóo “non ten palabra” por un lado defende que goberne a lista máis votada e por outro pacta con Vox e Ciudadanos onde sexa necesario el pacta “cunha versión estrema de populismo” deixando á cidade de Ourense nunha situación moi preocupante.

Os galegos e galegas, engadiu a líder do BNG, no 2020 darán fin a esta década de Feixóo caracterizada polos recortes. Hoxe mesmo,   o persoal sanitario de Atención Primaria permanecen en folga ante a falta de recursos e medios. Dende o concello de Lugo quero enviar o meu apoio e o do BNG ás reivindicacións dos traballadores e traballadoras en folga.

O BNG QUERE DEVOLVERLLE O ORGULLO A LUGO

Pola súa parte, o portavoz municipal do BNG, Rubén Arroxo afirmou que no concello de Lugo ábrese unha nova etapa na que os  cinco concelleiros e concelleiras nacionalistas levarán adiante todos os proxectos para que a cidade de Lugo “se sinta orgullosa”. Traballaremos para mellorar as infraestruturas, darlle un pulo a área de cultura e desenvolver todas as potencialidades que o turismo ten nesta cidade. Arroxo anunciou que o BNG priorizará os servizos de atención á veciñanza e potenciará a participación.