Ana Pontón insta a nacionalizar ALCOA e a por en marcha unha tarifa eléctrica que poña fin ao espolio da enerxía

Unha delegación do BNG, encabezada pola portavoz nacional, Ana Pontón participou na manifestación convocada polos traballadores e traballadoras de ALCOA-San Cibrao no concello de Viveiro contra o peche da factoría e a perda de centos de postos de traballo.

Pontón afirmou que a solución para a ALCOA é “a nacionalización e unha tarifa eléctrica” para acabar co espolio enerxético en Galiza e  insistiu en que hoxe é máis   necesario que nunca “vontade política” para salvar miles de empregos en toda a comarca da Mariña ante o anuncio de  peche dunha fábrica vital para o futuro desta comarca.

A día de hoxe, dixo, hai máis  534 traballadores e traballadoras en risco aos que hai que sumar os das empresas auxiliares. Resulta “un escándalo” que nin o goberno galego nin o goberno central defendan unha alternativa viable cando esta alternativa existe, “nacionalizar a fábrica e xunto a esa intervención pública, unha tarifa eléctrica galega que nos permita poñer fin ao espolio desta enerxía”, recalcou.

Pontón asegurou que resulta inconcibible que con tanta  riqueza eléctrica  en Galiza teñamos o futuro desta comarca pendente desta enerxía. “É urxente que a Xunta e o goberno central busquen solución e non problemas”, afirmou.

Feixóo non se reúne cos traballadores e traballadoras de ALCOA

A nacionalista explicou que na actualidade contamos cun marco eléctrico que puxo en marcha o Partido popular e non foi modificado polo Partido socialista, a pesar “das súas promesas”. Feijóo, engadiu Pontón,  “leva desaparecido en combate desde que sabemos que a comarca da Mariña ten en risco o seu futuro” e non  entendemos  como o Presidente da Xunta, o candidato do Partido popular, leva dez días sin reunirse cos traballadores e traballadoras desta comarca. “Que hai máis urxente que defender o emprego?” Qué hai máis importante que defender unha factoría que representa o 30% do PIB e miles de postos de traballo? preguntou.

A portavoz do BNG comprometeuse a defender o futuro de ALCOA cunha “intervención pública entre a Xunta e o Estado e unha defensa dun novo marco enerxético” no que todos os galegos e galegas teñamos garantida unha tarifa que rebaixe o prezo da enerxía. En Euskadi o lendakari Urkullo defendeu esa tarifa mentres en Galiza, “Feixóo vetou a tarifa durante estes anos, a pesar de ser unha solución para os traballadores da Mariña e para moitas empresas do noso país”, concluíu.