Ana Pontón fai un chamamento a unha mobilización masiva o domingo en Santiago para frear a bomba ambiental de Altri
Pide demostrar cunha “marea de dignidade” na manifestación que a vida da xente do rural e do mar importa máis que calquera multinacional
Insta a Rueda a deixar de “facer de comercial” dunha macrocelulosa que non queren en Portugal, na vez de defender os intereses dxs galegxs
O BNG propón un Plan Ulloa-Ulla-Arousa para revitalizar as comarcas afectadas, financiado cos 250 M€ de fondos europeos que o PP quere dar á compañía
A portavoz nacional, Ana Pontón, fixo dende Palas de Rei un chamamento a unha mobilización masiva na manifestación convocada para este domingo, día 15, en Santiago pola Plataforma Ulloa Viva e a Plataforma en Defensa da Ría de Arousa co obxectivo de parar “a bomba ambiental de Altri que o PP quere colocar no corazón de Galiza”.
Para conseguilo, Pontón considerou “fundamental” encher as rúas cunha “marea de dignidade” que diga alto e claro que non se pode permitir a instalación dunha “macrocelulosa contaminante” que pon en risco o modo de vida dos galegos e das galegas, o territorio e o presente e futuro do País.
“Temos que saír a defender a dignidade de Galiza para dicir que nos importa máis a xente do rural, a xente do mar, que os intereses dunha multinacional que quere vir a contaminar o noso país”, afondou.
Nun acto desenvolvido no Castelo de Pambre xunto a alcaldes, responsables municipais e comarcais e deputados e deputadas do BNG, a portavoz nacional advertiu do risco que supón este megaproxecto contaminante para as comarcas afectadas, como a da Ulloa, cun “enorme potencial” no sector agrogandeiro, pero tamén no turístico.
“Todo isto está en risco porque vemos a un Partido Popular facendo de comercial de Altri e que quere poñer por diante dos intereses de Galiza os intereses dunha multinacional, colocando no corazón do rural unha celulosa que non queren en Portugal”, denunciou.
Neste sentido, considerou a aposta do PP “un modelo do pasado” e cualificou como “unha auténtica indignidade” que o Executivo de Alfonso Rueda lle queira entregar 250 millóns de euros públicos a unha empresa portuguesa “para que veña a contaminar o País”.
“Quero pedirlle ao señor Rueda que deixe de facer de comercial de Altri e que poña por diante os intereses dos galegos e das galegas”, reclamou Pontón, quen, fronte a ese modelo do pasado do PP, confrontou o “modelo de futuro” que defende o BNG.
Un modelo de futuro que, neste caso, pasa polo desenvolvemento dun Plan Ulloa-Ulla-Arousa para revitalizar e impulsar o desenvolvemento económico das comarcas afectadas pola macrocelulosa, un plan financiado con cargo aos 250 millóns de fondos europeos que o PP quere dar a Altri.
“Hai que facer, xustamente o contrario”, afirmou, para pedir que eses 250 millóns sexan destinados a “apoiar a xente que está creando riqueza na comarca”, aos sectores produtivos, ás pequenas e medianas empresas e a poñer en marcha proxectos transformadores que fixen poboación e que o fagan dunha maneira sustentable, enumerou.
A líder nacionalista avogou tamén por recuperar e rexenerar tanto o río Ulla como a ría de Arousa e pola posta en marcha dun novo modelo forestal que aposte por un monte multifuncional e pola transformación da madeira e non, recalcou, “por seguir convertendo Galiza nun megaeucaliptal”.
“Temos sectores produtivos que son moi importantes e temos que apoiar a nosa riqueza no rural e, para iso, é clave que freemos ese megaproxecto contaminante que o Partido Popular quere impoñernos no corazón do noso país”, concluíu.