Adán reprocha a Conde a súa inacción ante a destrución do tecido industrial
A deputada cualifica de alarmante a pendente imparable de perda de industrias e postos de traballo en Galiza desde que goberna o Partido popular
Pleno-. A portavoz de Industria do BNG, Carme Adán interpelou hoxe ao conselleiro do ramo, Francisco Conde sobre a política prevista polo Goberno galego para frear a destrución do tecido industrial de Galiza.
Na súa intervención, Adán reprochou ao conselleiro a súa inacción ante o desmantelamento do sector naval e industrial galego, vostede, dixo, debe pensar que o Parlamento é un tendal de roupa porque cada vez que acode a Cámara os deputados e deputadas vestimos camisetas de T-solar, Arteixo Telecom, Megasa, Pórtico, Cementos Cosmos, Alfageme...
Para a deputada, o conselleiro de Industria obvia a dramática situación da desfeita industrial que se está a producir en Galiza e que xa provocou a perda de 37.000 postos de traballo, vostedes apostan polo modelo Keynesiano, dixo, socializan as perdas e privatizan os beneficios.
Conde tampouco se compromete cos traballadores/as de T-Solar
Ante a presenza de traballadores de T-Solar na tribuna de público no transcurso do debate parlamentario, a deputada preguntou ao conselleiro se prevía manter unha xuntanza co colectivo e lamentou o voto en contra do Partido popular da iniciativa nacionalista destinada a liderar un proceso de mantemento da actividade da fábrica fotovoltaica e a continuidade dos postos de traballo.
Pola súa parte, o conselleiro respondeu que Galiza foi a comunidade na que máis baixou o paro e o Goberno galego ten unha política industrial moi concreta, non vai nacionalizar as empresas con problemas porque na actualidade existen outras que están na senda de crecemento. Para Conde, Galiza é unha das rexións que máis crecen en Europa.
O conselleiro salientou os datos positivos nas exportacións e a lei de emprendemento, tamén cun gran éxito empresarial.
Galiza vs País de Yupis para o conselleiro de Industria
Na quenda de réplica, a nacionalista acusou ao titular de Industria de vivir nun país de yupis porque, explicou, só hai que saír a rúa e falar coa xente para saber como está o país, non hai acceso ao crédito e vostede no transforma o Igape nun Instituto público galego de crédito para salvar ás empresas agás, asinar EREs. O desemprego aumenta alarmantemente e a mocidade máis formada vese obrigada a emigrar, en que país vive vostede Sr. Conde, preguntou.
Sobre innovación, Adán afirmou que decreceron un 30% as empresas grazas a lei fume do Partido popular que mantén aos investigadores sen futuro e no relativo ao emprendemento criticou que a Xunta só destine 4 millóns de euros.
A deputada lamentou que o conselleiro de Industria non mencionara na súa intervención o compromiso de reunirse cos traballadores/as de T-Solar presentes no hemiciclo e non avanzara os instrumentos que ten en marcha a súa consellería para resolver a dramática situación do tecido industrial galego.
Adán concluíu reprobando a actitude expectante da Xunta ante Pescanova, a liquidación das caixas de Aforro e a situación de desemprego en Galiza.