Adán pide a Industria investir en I+D, construír o dique e renegociar a débeda de Pescanova
A deputada, trala comparecencia do consellerio, acusou ao PP de levar a Galiza á liquidación
Ante a caída alarmante do sector industrial galego, a deputada do BNG, Carme Adán propuxo cinco medidas urxentes destinadas a rescatar o sector: transformar o IGAPE nun instrumento financeiro con novos recursos, construír o dique flotante,eliminar a retroactividade do TAX LEASE, levantar o veto a Navantia, nova dirección para Pescanova e renegociar a débeda, investir en I+D+i e presentar un plan de minería para Galiza.
Trala comparecencia do conselleiro de Industria para explicar as liñas e obxectivos do seu departamento, a deputada acusou a Conde de viaxar de comercial por México, mentres se perden miles de postos de traballo nos sectores máis competitivos e estratéxicos para desenvolvemento económico galego.
Sector eólico paralizado por unha decisión sectaria do PP
Sobre o sector eólico, a deputada afirmou que a partido popular está arruinando as enerxías renovables, non pode falar do sector eólico porque vostedes son os culpábeis da súa parálise e serán todos os galegos e galegas quen pagarán un canon inxusto.
Vostede non ten que reflexionar, debe actuar reiterou porque o tecido industrial en Galiza está desaparecendo, o sistema financeiro galego pulverizado e o Goberno de Feijóo instalado nunha empresa de marketing e propaganda.
Feijóo, dixo, de comercial polas Américas traficando coa nosa desesperación mentres o desemprego aumenta e 18.000 persoas, mozos e mozas xa non residen en Galiza.
Sector naval, Pescanova e Caixas galegas fracasos do Partido popular
A parlamentaria denunciou que a Xunta deseñara plans acuícolas á medida de Pescanova cun rescate á empresa de 42 millóns de euros, agora a situación tradúcese na perda de miles de postos de traballo e un comportamento desleal dos seus directivos.
No tocante ao Naval, Adán cualificou de novos contos os contratos de Pemex e a viaxe de Feijóo a México e preguntou onde está o dique flotante, os floteis o Tax Lease, onde están os dous mil empregos prometidos para o naval?.
A nacionalista criticou que o conselleiro se referira con eufemismos como, economía verde para referirse a minería, especialización intelixente cando a xuventude galega é obrigada a emigrar na procura de traballo ou unha metodoloxía innovadora para comercio galego cando en realidade o sector desaparece día a día.
Eufemismos para agochar a realidade
Para a deputada, mentres miles de persoas se manifestan en contra da mina de Corcoesto ou a mocidade emigra, o Goberno galego mostra unha pasividade palmaria e pediu responsabilidade política ao conselleiro de Industria para actuar contra a crise económica.
A nacionalista reprobou a propaganda institucional sobre un Plan Industrial do Eólico para Galiza que, na súa opinión, representou cero MW e a perda de miles de postos de traballo, por unha decisión sectaria e revanchista de Feijóo contra o concurso eólico do Goberno bipartito.
Na quenda de resposta ao conselleiro, Adán preguntou se as políticas liberais do Partido popular e a recesión confirman a mellora do noso país ou polo contrario, vivimos nun momento de recentralización política, económica e financeira cara a Madrid co desleixo cómplice do Partido popular galego.
Non é que teñamos unha visión apocalíptica, engadiu, todo o contrario, somos realistas sobre o abandono do noso país, os únicos proxectos enriba da súa mesa son os da minería contaminante e de instalación de multinacionais nun país que se regala de maneira colonial
A nacionalista concluíu pedindo ao conselleiro de Industria que traballe para que as empresas consigan crédito, defenda unha entidade financeira de cárter público, converta o IGAPE nun instrumento de crédito público e ofreza unha solución real e crible ao tecido empresarial para que non se repitan situacións como as de: Cuca, cementos Cosmos, Astrong ou Caramelo.