Adán nega a rápida recuperación do Sector naval da que presume o Goberno galego
A deputada acusa ao Goberno galego de facer política ficción dun sector en situación agónica e lamenta que o conselleiro non responda sobre a construción de buques civís en Navantia no ano 2015, as previsións sobre o dique flotante e as xestións do Goberno galego para levantar o veto inxusto a Navantia
A deputada do BNG, Carme Adán criticou o triunfalismo do conselleiro de Industria na súa comparecencia para informar da situación do sector naval e considerou que os datos aportados por Conde, contradín á realidade produtiva e laboral d@s traballadores/as do sector.
Para a deputada, resulta chamativo que a Xunta sega no camiño da falsa publicidade positiva mentres o sector naval galego cada día atravesa por máis dificultades e amosou un gráfico para demostrar os datos de contratación nos estaleiros dende o ano 2002 ao 2013 que confirman unha unha maior caída de carga de traballo no ano 2011 e cero contratación de pedidos no 2013.
Francisco Conde no Ministerio da verdade de George Orwell
Adán comparou a comparecencia do conselleiro co protagonista de 1984 de George Orwell, Wiston Smith, dedicado a reler no pasado co fin de botar as culpas os demais, despois de escoitalo, dixo, parece que o Partido popular non gobernou nunca.
A parlamentaria tamén cualificou de xogos semánticos para política ficción os eixos da xestión da consellería da que dixo, está ao límite ao igual que a situación industrial galega.
Ademais se referiu ao sector eólico ao que o conselleiro non aludiu na súa comparecencia , vostedes, desmoronaron esta actividade produtiva á que debemos sumar a caída do índice na produción industrial nun 2,1% fronte á recuperación do 2% no resto do Estado, xa non poden seguir negando que o sector industrial cae en picado.
Sobre os datos de emprego asegurou que na industria son os peores da economía galega, perdeuse o 28% dende o ano 2009 ao 2014, e no primeiro trimestre deste ano, 1.600 persoas perderon o seu posto de traballo, polo tanto non hai ningún tipo de recuperación, recalcou.
Feijóo segue sen cumprir as súas promesas
A deputada preguntou ao conselleiro se é consciente dos incumprimentos do Presidente da Xunta, a respecto do sector naval, incumprimentos entre os que destacou: o dique flotante, a posta en funcionamento do Tax Lease e a Lei de fomento do sector naval.
Na quenda de réplica, Carme Adán lamentou a falta de respostas concretas ás cuestións formuladas e volveu criticar que o conselleiro afirmara que existe un 40% de pedidos cando o maior nivel nesta materia, explicou, rexistrase no País Basco co 42%, Asturias 36% e despois figuraría Galiza e a caída real de pedidos prodúcese nos anos de Goberno de Núñez Feijóo.
Adán rematou preguntando se o 1 de xaneiro de 2015 Navantia comezará a construír buques civís, que xestións realizou a Xunta de Galiza para levantar o veto, porqué o Goberno galego non participa do consello de Administración da empresa e sobre o dique flotante, sabemos algo? ou seguirá sendo un anuncio electoral.