Adán acusa a Beatriz Mato de falta de vontade para tramitar as solicitudes da RISGA
A deputada denuncia retrasos de sete e oito meses e acusa á conselleira de Traballo e Benestar, Beatriz Mato de mentir e ralentizar os expedientes para non abonar os pagos
O BNG acusa á Xunta de non ter vontade para tramitar as solicitudes da RISGA e reclama que Consellería de Traballo e Benestar cumpra a lei nesta materia.
A deputada do BNG, Carme Adán compareceu hoxe, ante os medios de comunicación, en sede parlamentar ante a situación xerada cos retrasos nas tramitacións da Renda de Integración Social (RISGA).
Adán asegurou que os afectados/as acumulan ata oito meses dende a presentación da petición, circunstancia que, na súa opinión, obedece á falta de vontade de tramitar os expedientes co fin de adiar os pagos da RISGA e a unha mala práctica da consellería de Traballo e Benestar
A parlamentaria explicou que o BNG conta con numerosa documentación de afectados/as que solicitaron unha axuda para facer fronte aos pagos e non poden agardar meses. Documentación que non fixo pública para garantir a confidencialidade dos solicitantes.
Carme Adán explicou que o BNG rexeitou a Lei de Inclusión Social de Galiza por insuficiente e reclamou que a pesar de ser escasa a Xunta debe cumprir o artigo 37 que contemple a resolución da RISGA en dous meses.
A nacionalista tamén aludiu a intervención da conselleira Beatriz Mato na última sesión plenaria na que afirmou que non existían os retrasos denunciados e asegurou que os concellos teñen recollidos moitos expedientes con retrasos de seis, sete e mesmo oito meses polo que pediu a titular de Traballo e Benestar que non minta sobre a situación dramática que están a vivir moitos galegos e galegas.
Neste sentido, engadiu que nalgúns concellos o 100% das solicitudes presentadas no ano 2014 seguen pendentes ao igual que a a maioría das do ano 2013.
Muller con fillos ao seu cargo e ingresos de 175 euros
A nacionalista indicou que 30.000 fogares galegos non reciben ningún ingreso e 465.000 persoas viven por baixo ou no limiar da pobreza e recordou que o propio Valedor do Pobo, no último informe, constatou o aumento das solicitudes de axudas sociais como a RISGA ou as Axudas de Emerxencia Social e as queixas polos retrasos na súa resolución
Ante as mensaxes optimistas do Partido popular, sobre todo en período electoral, a parlamentaria do BNG recomendou ao PP achegarse aos servizos sociais dos concellos e constatar a verdadeira situación de pobreza de moitas persoas e familias galegas.
Finalmente, Adán reiterou que a conselleira de Traballo e Benestar non pode seguir obviando e negando esta realidade polo que pediu resolver sen dilación os expedientes pendentes.