Votar BNG é votar País, é garantir o futuro para o noso naval e para a nosa mocidade

 

O candidato do BNG á presidencia da Xunta, Francisco Jorquera, pediu  o voto para a formación nacionalista porque “temos un proxecto de País, temos ideas e temos propostas para sacar Galiza adiante e reconducir a situación de auténtica ruina á que nos conduciu Feijóo”.

Jorquera, nun acto público esta tarde noite no Teatro Jofre de Ferrol, afirmou que unha comarca como a de Ferrolterra sabe ben de que está a falar cando fala de “demolicións Feijóo” ou de “Feijóo mentirán”, porque un dos principais motores económicos da zona, como é o sector naval, está totalmente paralizado a causa das políticas tanto da Xunta como do Estado como de Bruxelas.

Neste sentido, ironizou co feito de que hoxe mesmo o acto principal do PP da campaña sexa tamén en Ferrol e dixo, “mentres nós facemos un mitin, para presentarvos o noso programa e os nosos compromisos se nos dades a oportunidade de gobernar o próximo Domingo, Feijóo estará tirando de promesas incumpridas”.

“Porque Feijóo vai facer o que acostuma a facer cando se achega un período electoral, prometervos o dique flotante e carga de traballo para Navantia. Pero hoxe máis que nunca, que comeza o xuízo do Prestige, sabemos do valor da súa palabra e da palabra dos cargos do PP”.

Lei do Sector Naval

Logo de reivindicar a súa orixe ferrolana e de sumarse ao berro de Nunca Máis, "Nunca Máis Feijoó",o candidato do BNG reivindicou que Galiza é un país rico, só precisa dun goberno que crea nas súas potencialidades e poña o País a producir. “No BNG defendemos que sexamos nós os que gobernemos os nosos recursos e poidamos decidir en Bruxelas sobre todos aqueles asuntos que nos afectan directamente, como todo o que ten a ver co naval”.

A este respecto, asumiu tamén que o BNG fará cumprir a Lei do Sector Naval de Galiza, impulsada por Iniciativa Lexislativa Popular pero que o PP nunca desenvolveu, traballará para levantar o veto á construcción civil en Navantia-Fene e teimará para a construcción do dique flotante.

Jorquera lembrou que cando era pequeno oía dicir que Galiza era a despensa de España, por iso amosouse convencido de que pondo o País a producir se pode xerar emprego e se pode saír da espiral perversa dos recortes do PP, que só traen consigo máis recortes e involución.

O BNG seguirá teimando polo dique flotante, o grande incumprimento de Feijóo, por levantar o veto á construcción civil en Navantia e por desenvolver un Plan Plurianual de Emprego Xuvenil

Para o candidato nacionalista, nestes momentos o escenario está totalmente aberto por iso fixo un chamamento a participar, a apoiar a quen ten demostrado ter como prioridade este País: o BNG, “porque o cambio que precisa Galiza é posíbel, está da vosa man, vaise xogar por un puñado de votados”.

O proxecto que ten o BNG, engadiu, é un proxecto aberto, para construir entre todos, por iso entre as propostas do programa nacionalista está a de sacar adiante unha Lei de Consultas populares, “que mellore a calidade da nosa democracia”.

Mocidade

Jorquera reiterou que este proxecto non se pode construir sen a mocidade, non hai País que poida ter futuro se a súa xente nova e máis formada sigue emigrando, por iso comprometeuse a desenvolver un Plan Plurianual de Emprego Xuvenil e a incorporación ao sistema galego da I D I de novos investigadores e tecnólogos.

“Os dados coñecidos hoxe do Instituto Nacional de Estatística son demoledores, afirmando que cada mes se van de Galiza dous mil mozos entres 20 e 34 anos, por iso fago un chamamento especial a este electorado, para que vote rebelde, para que vote BNG”.

Guillerme Vázquez

Pola súa parte, o portavoz nacional, Guillerme Vázquez, pediu o voto para o BNG poque é a única forza que pode resolver os problemas de Galiza, "porque diso se trata nestas eleccións, de resolver os nosos problemas, o noso futuro, non o de Grecia, España ou Europa".

Asegurou que Galiza non se merece un presidente como Feijóo, un presidente claramente antigalego que convertiu o seu goberno nunha auténtica "fábrica de parados".

Ana Pontón

A candidata número dous pola Coruña, Ana Pontón, coincidiu con Jorquera na chamada ao voto da mocidade e en denunciar a sangría da emigración xuvenil, pondo o exemplo do rapaz que conta a súa experiencia estes días nas redes a través dun vídeo de cando foi votar, coa esperanza de poder volver á súa terra.

Afirmou que é o momento de "mollarse" e animou a facelo "por quenes sempre estivemos aí, do lado de todas as causas xustas, traballando cóbado con cóbado coa xente nas súas reivindicacións, de sanidade, de ensino, da cultura, pola lingua... Transformemos a protesta nas rúas en conciencia social e en voto ao BNG".

Ante unha asistencia de case 500 persoas, todos os intervintes coincidiron en denunciar os feitos ocorridos cos sindicalistas da CIG na noite de inicio de campaña e proclamaron que malia "a represión, non nos calarán".

 

http://youtu.be/dDUj5uqgCj0