Vence: "Coa complicidade de Feijóo, lévannos o ouro de Corcoesto e deixan aquí arsénico e cianuro"

O Bloque Nacionalista Galego participou esta mañá na mobilización contra a mina da multinacional canadiana de Edgewater en Corcoesto, unha manifestación que percorreu as rúas de Carballo e na que estivo presente o portavoz nacional do BNG, Xavier Vence, entre unha nutrida representación da Executiva Nacional, o portavoz do BNG no Parlamento de Galiza, Francisco Jorquera e as deputadas Ana Pontón e Carme Adán ou o propio alcalde de Carballo, Evencio Ferrero, ademais de numerosa militancia.

En declaracións aos medios, o portavoz nacionalista advertiu da ameaza para a saúde e para o ecosistema que supón o proxecto da mina de Corcoesto e amosouse moi crítico coa “inconsciente e insensata política de Feijóo”, que “permite e subvenciona o espolio o dos nosos recursos minerais a beneficio dunha multinacional que vai deixar unha contaminación enorme de cianuro no noso país”. “Trátase dun proxecto de minaría dos máis agresivos co medio, xa que será unha mina a ceo aberto que utiliza as técnicas máis perigosas, como é o uso do cianuro para separar o mineral e o arsénico”, engadiu.

“Eles levan o ouro e aquí deixan o arsénico e o cianuro”, alertou o portavoz nacional do BNG. Nesta liña, puxo de manifesto que “a riqueza da explotación de Corcoesto, que vai estar aberta apenas un lustro, mentres dure a burbulla especulativa do ouro, vai voar integramente ás contas de Edgewater e aquí van quedar, durante décadas, toneladas e toneladas de residuos contaminantes perigosísimos”.

Co visto e prace de Feijóo, uns poucos anos de explotación van deixar veleno que vai durar décadas ou séculos

Xavier Vence sinalou que os gases desprendidos da minaría a ceo aberto, os líquidos incontrolados e os residuos “van danar a nosa saúde, a agricultura, tan singular como a da pataca de Coristanco, e a produción leiteira nas parroquias próximas”. Así, denunciou que “co visto e prace de Feijóo, uns poucos anos de explotación van deixar veleno que vai durar décadas ou séculos”.

Na súa intervención ante os medios, o portavoz nacional do BNG criticou que a Xunta de Galiza realizara un informe favorábel á mina da multinacional sen ter en conta as limitacións dos informes medioambientais, tal e como vén de recoñecer a Defensora del Pueblo, a raíz da denuncia a Sociedade Galega de Historia Natural (SGHN), e tal e como veñen denunciando diferentes especialistas, técnicos e colectivos ecoloxistas.

Feijóo renuncia a poñer en valor os nosos recurso

Así mesmo, Xavier Vence acusou o Goberno de Feijóo de “renunciar a poñer en valor os nosos recursos” e de “achegar subvencións extraordinarias a un proxecto tan contaminante” (ao considerar proxecto industrial estratéxico). En Galiza, insistiu o portavoz nacionalista, tan só vai quedar a contaminación de cando menos 12 toneladas de cianuro e millóns de toneladas doutros residuos.

Pola outra banda, Vence advertiu de que “se van crear moi poucos empregos, e de carácter temporal e precarios”. Salientou, ademais, que a mina de Corcoesto “ameaza con destruír moitos máis empregos na agricultura da zona, no marisqueo da Ría de Ponteceso e nas actividades turísticas da zona”.

Por último, o portavoz nacional reiterou a solidariedade e apoio incondicional do BNG á veciñanza de Cereo e todas as que hoxe constitúen a  Plataforma de Corcoesto e Bergantiños “nesta batalla na que todos nos xogamos a nosa economía, a nosa saúde, o noso medio e a aposta por un modelo de desenvolvemento sustentábel”.