Ante o suicidio dunha muller en Barakaldo, o BNG afirma que é un "asasinato" da banca

O portavoz nacional do BNG, Guillerme Vázquez, cualificou esta mañá en rolda de prensa á banca de “asasina sen alma” como responsábel directa de feitos como o que se produciu esta mañá en Barakaldo cando unha muller, a piques de ser desafiuzada, se suicidou.

“Estamos falando dun asasinato”, asegurou Guillerme, ao tempo que lembrou que “primeiro o PSOE e despois o PP meteron miles de millóns de euros para que os bancos fagan o que lles veña en gana e os que permiten que se cometan asasinatos son cómplices”.

O líder nacionalista lembrou que o BNG ten presentado iniciativas en defensa das persoas que son botadas da súa casa “iniciativa que foi votada en contra polo PP e polo PSOE, o que demostra unha vez máis que uins estamos nunha cousa e outros noutra, non somos todos iguais”.

“Queren crear un Titanic social e cando se afunda o barco, haberá lanchas para os de primeira, mentres lles baixan as reixas para que afoguen ao resto”, afirmou Guillerme, ao tempo que lembrou que “é necesario un cambio radical da política económica e fiscal e niso está o BNG, pelexándonos na rúa día a día, tomando iniciativas”.

 

http://youtu.be/htj3Xg6fv2o