A sentenza bananeira manda unha mensaxe de impunidade para contaminar a nosa costa

O BNG presentará mocións en todos os concellos en contra deste “prestige xudicial” e apoia as convocatorias de protesta de Nunca Máis

Reclama competencias e medios en seguridade marítima porque Galiza segue igual de indefensa ante unha catástrofe ambiental

En 2002 o Prestige encheu de chapapote a costa galega provocando unha catástrofe ambiental sen precedentes. Once anos despois, Galiza sofre un “prestige xudicial” cunha instrución “teledirixida polo goberno e polo PP que supón un auténtico naufraxio da xustiza”, en valoración do portavoz nacional do BNG, Xavier Vence.

“A sentenza é propia dunha lexislación bananeira e lanza unha mensaxe de impunidade para contaminar a nosa costa. Ven a dicirlle ás empresas armadoras e petroleiras que poden contaminar que non terá consecuencias”, denuncia Vence, quen a compara coa resolución da Corte Superior de EEUU á petroleira Exxon Mobile polo verquido do Exxon Valdez, cunha sanción de 366 millóns de €, ou a recentísima sentenza da Corte Nacional de Ecuador contra a petroleira Chevron, á que sanciona con 6.400 millóns de euros para indemnizacións.

“En ambos casos por desastres ambientais menores co provocado polo Prestige no noso litoral”, indicou.

O dirixente nacionalista considera “un despropósito xurídico que ninguén pague por uns feitos tan graves, nin a armadora, nin a petroleira, nin a aseguradora, nin a camarilla do PP que contribuíu a agrandar a catástrofe, todos se van de rosiñas”, denuncia Vence. “A única que pagou foi Galiza, asumindo as consecuencias ambientais e económicas da catástrofe”.

Deficiente instrución

Vence criticou que a deficiente lexislación española para afrontar a catástrofe, se sumou un proceso de instrución “teledirixido” polo Goberno e polo PP, “trufado de irregularidades con continuos cambios nos responsables de levar a cabo a instrución” e o feito “premeditado” de deixar un caso de tal complexidade e magnitude no Xulgado de Corcubión con apenas medios.

“A sentenza responde aos intereses do poder político, arrastra unha deliberada deficiente instrución e ten como obxectivo salvar a camariña do PP que estaba e segue a estar no poder”, conclúe.

Está Galiza máis preparada?

Vence anunciou que o BNG vai presentar mocións en todos os concellos para rexeitar o resultado da sentenza, e iniciativas no Parlamento e no Congreso para reclamar as competencias e medios en seguridade marítima, “porque a nosa costa segue igual de indefensa, se hoxe tivésemos outro verquido de 76.000 toneladas de chapapote”.

O Bloque apoiará as concentracións de protesta convocadas pola Plataforma Nunca Máis en distintas cidades e vilas do país, “como xesto para manter a dignidade ante unha sentenza que supón unha afronta a todos os galegos e galegas e aos que viñeron de fora de Galiza e puxeron ánima e mans para loitar contra o chapapote”.