O PP ten as eleccións perdidas se os votos nacionalistas e de esquerdas se concentran no BNG

 

O candidato do BNG á presidencia da Xunta, Francisco Jorquera, asegurou esta noite na apertura da campaña que o PP ten as eleccións perdidas se os votos nacionalistas e de esquerdas se concentran no BNG.

Jorquera afirmou que a concentración do voto no BNG é a chave para derrotar ao Partido Popular, para pór fin a 3 anos de “fracasos”, “mentiras” e “incumprimentos” de Feijóo e facer posíbel o cambio real que precisa Galiza.

“Feijóo tivo a súa oportunidade –dixo- e desaproveitouna, deixando o País á beira da ruina. Con Feijóo batimos o récord de parados, pois 113.000 persoas perderon o seu traballo durante a lexislatura; triplicamos a débeda pública; 60.000 mozos e mozas tiveron que coller a maleta para emigrar; os nosos estaleiros non constrúen barcos e os nosos gandeiros venden o leite máis baixo que no resto do Estado”.

Novo tempo político

Para o candidato nacionalista, o 21 de Outubro ábrese a posibilidade de iniciar unha nova etapa na historia do País, de apostar por outras políticas, por un proxecto pensado para os traballadores e traballadoras, “non un proxecto para os ricos e banqueiros como fixo Feijóo”.

O BNG ten un proxecto de País, un proxecto chamado soberanía, un proxecto chamado democracia, un proxecto chamado traballo

Guillerme Vázquez e Ana Pontón

Jorquera abriu con esta intervención a tradicional pegada de cartaces na Praza de Praterías de Santiago, nun acto no que tamén tomaron a palabra o portavoz nacional do BNG, Guillerme Vázquez, e a candidata número 2 pola provincia da Coruña, Ana Pontón.

Ana Pontón advirte que e se nós non facemos a política farana eles por nós e farana só para defender os intereses dos banqueiros non os das maiorías sociais

Guillerme Vázquez pediu o voto para o BNG porque é a forza política que está co pobo, que está coa xente. “Estivemos cos do naval, cos estudantes, cos afectados polas preferentes. O BNG está a pé de obra para facer frente á crise, para ser insumiso ante os recortes provocados por esta crise que é unha grande estafa”.

Ana Pontón defendeu a política como vía para cambiar as cousas, a política como participación social e proclamou que “se nós non facemos a política farana eles por nós e farana para defender os intereses de banqueiros e poderosos non os os nosos intereses, os das maiorías sociais”.

 

 

http://youtu.be/fvO9YIfTE04