Jorquera: “ O PP quere facer unha reforma da Lei electoral a súa medida para conservar a maioría”

 Na orde do día do  vindeiro pleno no que será debatida a reforma electoral para reducir de 75 a 61 os escanos do arco parlamentar, o PP tampouco aceptou que comparecera a conselleira de Sanidade para explicar o ascenso do seu marido e propoñendo no seu lugar, unha comparecencia do conselleiro de Ordenación do Territorio, Agustín Hernández para falar de seguridade viaria

 Tras a xunta de portavoces, o portavoz do Grupo parlamentar do BNG, Francisco Jorquera criticou que o Partido popular introducira no vindeiro pleno da Cámara galega unha proposta de reforma da lei electoral para reducir de 75 escanos a 61 o novo arco parlamentario.O nacionalista denunciou a intención do Partido popular de quere facer “unha lei electoral a súa medida” porque a día de hoxe, o PP “sabe que ten perdida a súa maioría”.

Jorquera lamentou que o PP non accedera ao diálogo proposto polo BNG para chegar a acordos encamiñados a mellorar a participación democrática pero o Partido popular persiste na súa actitude de “violar unha norma” que establece que as regras de xogo non deben ser nunca modificadas a instancias de parte.

O PP defende a austeridade para reducir escanos pero cobra en sobres B

No vindeiro pleno, dixo, haberá dúas propostas, a do PP consistente en recortar en democracia e autogoberno seguindo a senda da Sra. Cospedal que retirou a remuneración d@s deputad@s de Castela-A Mancha mentres ela cobraba tres salarios sen incluír “os sobres en B de Bárcenas” e a da oposición que rexeitamos o argumento falso do “aforro” como coartada. Todos os grupos da oposición xa propuxemos recortar o gasto do Parlamento de maneira equivalente á cantidade que suporía a redución de escanos, explicou.

Jorquera insistiu en que o argumento do aforro do PP colide co reforzo das deputacións provinciais, ministerios innecesarios ou a pervivencia de institucións inservíbeis como o Senado e os delegados do Goberno, o PP, reiterou, “quere unha reforma electoral a súa medida e acorde cos seus intereses” para reter a maioría absoluta que ten perdida.

O BNG pedirá na vindeira sesión plenaria que Feijóo cese de inmediato a conselleira de Sanidade

Por outra banda, Jorquera tamén anunciou que a pregunta do BNG ao Presidente xirará en torno as explicación do propio Núñez Feijóo sobre o “escándalo” que envolve á conselleira de Sanidade, Rocio Mosquera que posibilitou o ascenso do seu marido á xefatura de cirurxía dixestiva no período no que a actual titular de Sanidade era Xerente do CHUS.

Neste sentido, o nacionalista aludiu a recente sentenza do Tribunal Superior de Xustiza de Galiza contra o nomeamento do marido da conselleira por “desvío de poder”. Pola súa parte, lembrou Jorquera, o Presidente da Xunta manifestou que era un tema interno do Hospital, “Feijóo toma por tontos aos galegos”, afirmou o nacionalista.

Neste sentido, criticou a negativa do PP a que comparecera a titular de Sanidade propoñendo no seu lugar ao conselleiro de Ordenación do Territorio, Agustín Hernandez para falar de seguridade viaria, “co que está caendo, dixo Jorquera o PP pretende que falemos de seguridade vial”.

O BNG tamén pedirá ao Presidente que cese a todos os cargos do Partido popular imputados na Operación Pokemon.

Finalmente, na vindeira sesión plenaria e á iniciativa do grupo parlamentario nacionalista serán debatidas entre outras cuestións: a privatización dos servizos sanitarios, a contrarreforma da Lei do Aborto, medidas para combater a pobreza enerxética e alternativas para impedir os desafiuzamentos.