O BNG pide que compareza Pablo Crespo no Parlamento galego

Francisco Jorquera anunciou hoxe que o grupo parlamentario nacionalista solicitará a comparecencia do exsecretario de Organización do PPdeG, Pablo Crespo na comisión de estudo sobre a corrupción.

O BNG proporá aos grupos do PSdeG e AGE asinar conxuntamente a petición de comparecencia para dotala de “máis contundencia e forza” ao fin de esclarecer as “gravísimas manifestacións” do exsecretario do Partido popular de Galiza no programa “Salvados” emitido o pasado domingo no que insinuou que a “financiación ilegal do PPdeG” continuou despois de ter abandonado o cargo de secretario de Organización do Partido popular galego.

O portavoz parlamentario afirmou que Núñez Feijóo era coñecedor dese sistema polo que é necesario que “Pablo Crespo ratifique, neste Parlamento, as súas manifestacións” para que a Cámara galega poda concluír que medidas deben ser aplicadas contra os casos de corrupción que salpican ao partido gobernante en Galiza.

O BNG considera que Núñez Feijóo debe comparecer e deixar de “mirar para outro lado e seguir botando debaixo da alfombra a merda” por que, dixo, por desgraza xa non colle máis.

“Feijóo ten a obriga política e ética de comparecer ante o Parlamento para dar explicacións” pero dado que o PP permanece na súa actitude de bloquear coa súa maioría absoluta esta comparecencia e ampara a Núñez Feijóo e a súa política de “agochar debaixo da alfombra a merda”, o BNG esixe a comparecencia de Pablo Crespo na Comisión de Estudos da corrupción.