O BNG apela á unidade do Nacionalismo na Homenaxe de Bóveda

O portavoz nacional do BNG, Xavier Vence reivindica o “espírito construtivo de Bóveda” para traballar pola unidade de todo o nacionalismo e todos os que estean dispostos a defender Galiza para acadar un grupo parlamentario “galego e soberano” no Congreso dos deputados”

Na Homenaxe á memoria de Alexandre Bóveda no Día da Galiza Mártir celebrado hoxe no concello de Poio, o portavoz nacional do BNG, Xavier Vence recalcou que a Galiza da dignidade rende homenaxe a Galiza Mártir e á memoria da nosa nación, “hoxe lembramos a Bóveda e a os cinco mil demócratas galeguistas e republicanos que morreron asasinados polo exercito de Franco” e tamén aos miles e miles que sufriron torturas e persecucións da man desa “dereita cruel e antigalega”.

O BNG apela ao espíritu constructivo de Bóveda para traballar pola unidade do nacionalismo galego

Na súa intervención, o portavoz nacional reivindicou o “espírito construtivo” de Bóveda para traballar pola unidade de todo o nacionalismo e todos os que estean dispostos a defender Galiza co fin de acadar un grupo parlamentario “galego e soberano” no Congreso dos deputados”.

Para o portavoz nacionalista, as aspiracións políticas de Bóveda seguen en pleno vigor coa necesaria defensa de Galiza como nación e a loita polo autogoberno que neste momento é  atacado de xeito sistemático polo Goberno central do PP coa complicidade “indigna” de Feijoo o que constitúe, afirmou, “un auténtico golpe institucional” contra as nosas conquistas de autogoberno e conquistas sociais.

Máis que nunca, dixo, a obra e vida de Bóveda é un exemplo e o “facho” para os que queremos unha Galiza de seu e confiamos nas nosas forzas. Bóveda foi un exemplo de “unir o nacionalismo” e esa é a nosa tarefa hoxe.

Feijóo submiso ás directrices marcadas polo Goberno central

A laminación continua de competencias autonómicas que limitan as nosas políticas sociais e sectoriais, explicou, vénse agora agravadas coa limitación da acción exterior de Galiza plasmada de “maneira servil” polo Sr.Feijoo a través dun decreto de submisión ás directrices do Goberno central polo que reiterou que Galiza “ precisa un grupo parlamentario galego e soberano no Congreso dos deputados” para frear a involución centralista e antisocial e reverter ese proceso para abrir un novo escenario que recoñeza os dereitos nacionais de Galiza.

Necesitamos, recalcou, “ampliar progresivamente o noso autogoberno e acadar a soberanía que desenvolva unha sociedade máis xusta e dar pulo a nosa lingua e cultura”.

O BNG pide anular o xuízo que condenou a Bóveda

O portavoz do BNG concluíu a súa intervención aludindo ao recoñecemento da “reparación moral” pola inxustiza de persecución e asasinato pero queda, dixo, “anular o xuízo que o condenou”.