Defendeu modificar unha Lei que incumpre os principios tributarios e representa un novo imposto para as familias
Pleno- A Proposición de lei do BNG,defendida hoxe pola deputada Ana Pontón, para modificar a Lei de Augas de Galiza foi rexeitada polo Partido popular para a súa toma en consideración.
A parlamentaria afirmou que a auga é un servizo público que debe garantirse ao cen por cen da poboación e non representar un novo abuso para as familias.Neste sentido, pediu a supresión da suba do canon da auga e coeficiente de vertedura e considerou que unha Lei que non grava aos que máis consumen é inxusta e discriminatoria.
Os impostos na auga, lixo, sanidade e educación están a saquear a tod@s os galeg@s
A deputada denunciou os repagos en Educación e Sanidade aos que agora, dixo, haberá que sumar o canon da auga , nun 30% segundo a previsión do goberno, e o incremento do 34% da taxa de Sogama.
Os gobernos do Partido popular subiron de maneira abusiva os impostos mentres baixaron o salario e denunciou que dende a entrada en vigor da lei, os galegos e galegas pagan unha media entre un 7 e un 20% máis polo recibo da auga mentres as grandes empresas obteñen bonificacións.
Pontón incrementou as súas críticas na quenda de replica ao asegurar que a Lei precisa dun cambio radical xa que dende hai tres anos unicamente introduciu un cambio, o impositivo sobre un ben básico, a auga.
A modificación que propoñemos dende o BNG, manifestou, debe superar a visión mercantilista e frear os procesos de privatización cunha regulación axeitada para todos os usos da auga.
O PP négase a modificar a Lei de Augas e o coeficiente de vertido
Pontón, tras agradecer o apoio de PSdeG e AGE lamentou o voto desfavorable do Partido popular que imposibilita o cambio da lei e a revisión dunha fiscalidade inxusta aplicada no canon á que sumou o coeficiente de vertido.
Vostedes comezaron co canon da auga para continuar co incremento da factura no lixo e neste País, dixo, estamos nunha situación dramática na que moitas persoas non teñen para comer e vostedes, están a saquealos pola vía de impostos.
O BNG, ten alternativas en materia de xestión de auga e non é preciso ir a sistemas máis caros en saneamento e depuración, hai alternativas que funcionan en Europa que teñen a ver cos sistemas de depuración pero o Partido popular empeñase en construír máis e máis depuradoras que logo os concellos non poden manter.
Temos propostas para non saquear aos de abaixo gravando as rendas máis altas do IRPF e ás empresas contaminantes, e non rebaixas fiscais como no caso de ENCE.
A deputada estendeu a recadación de impostos á banca e grandes superficies comerciais, o que discutimos hoxe, reiterou, é a fiscalidade inxusta sobre un ben básico, a auga que os galegos e galegas pagamos máis cara dende que vostedes chegaron ao Goberno.
Porto do Son 1916: Historia dunha infamia.
Na súa intervención, a nacionalista amosou o libro de Xerardo Díaz Fernández, Historia dunha infamia sobre o acontecido na parroquia de Nebra, concello de Porto do Son, no ano 1916.
O texto narra como un concello aplicou impostos abusivos que veciños e veciñas deciden non pagar e opoñéndose a seren embargados.
O 6 de outubro acontece a traxedia de Nebra na que a Garda Civil agrede a súa poboación na que morren catro mulleres e un home, isto, non foi unha excepción en Galiza xa que moitas foron as revoltas contra os tributos.
A deputada lembrou que estas mortes sacudiron as conciencias dos traballadores e traballadoras, sobre todo nas bisbarras rurais onde o agrarismo creceu dunha maneira alarmante para o Goberno xerando moitos focos de loita...os mortos que descansen en paz e os vivos que coman broa se poden, esta, dixo, tamén é a receita do Partido popular no Estado e en Galiza. Hai un paralelismo, explicou, entre o acontecido en Nebra e a realidade que estamos a vivir hoxe, cen anos despois, a aplicación de tributos inxustos.