A portavoz do BNG no Congreso, Olaia Fernández Davila, e a deputada do BNG, Rosana Pérez, presentaron na Cámara unha proposición non de lei e unha iniciativa parlamentar relacionada coa catástrofe do Prestige e a situación de impunidade xerada a raiz da sentenza coñecida o pasado xoves.
As deputadas do BNG demandan ao Goberno que endureza a lexislación en materia de comisión de delito ecolóxico a fin de evitar que unha catástrofe como a do Prestige se poida saldar sen indemnización económica algunha.
Ademáis, as parlamentares nacionalistas piden ao Goberno central a transferencia á Xunta das competencias en materia de seguranza marítima, tanto normativas como de execución que inclúan o control e a inspección de barcos, para poder aplicar unha política preventiva propia en relación ao transporte marítimo de mercadorías perigosas.
Tamén piden o traspaso á Xunta das competencias en materia de salvamento marítimo e loita contra a contaminación mariña.
Unha sentenza decepcionante
Davila e Rosana Pérez lembran que a catástrofe do Prestige tinguiu de chapapote as costas de Galiza hai once anos, e demostrou as fraquezas en materia de seguranza do tráfico marítimo e a precariedade de medios para a loita contra a contaminación mariña no corredor de Fisterra, un dos que maior tráfico rexistra. Salientan as deputadas do BNG que a pesar da gravedade dos feitos, poderíamos afirmar que nada se ten avanzado. Un delito ecolóxico desas dimensións nen siquera é obxecto dunha sentenza exemplar por parte da xustiza.
Denuncian que non hai castigo para os autores da maior maré negra nin hai responsabilidades políticas pola errática e ineficaz xestión dun accidente que se agravou polas decisións adoptadas desde o Goberno central e a Xunta.
As parlamentares nacionalistas salientan que lonxe de progresar, e lograr unha sentenza exemplar por un delito ecolóxico grave como foi o do Prestige, resulta que se percorre o camiño á inversa: o Prestige non ten custe algún, sae gratis, salvo para os galegos e as galegas, e toda a maré humana que se implicou activamente na limpeza do noso litoral.
Alegan as deputadas do BNG que un dos moitos fallos na xestión do Prestige foi a enorme descoordinación entre administracións implicadas. o feito de adoptar decisións desde lugares alonxados de Galiza. A reivindicación de transferencias de competencias a Galiza nesta materia, non é froito dun capricho, é produto dunha mala experiencia, nefastas, da observancia do acontecido durante a crise do Prestige.
Tildan a sentenza de decepcionante, que non só premia o delito ecolóxico senón que os seus responsábeis quedan impunes, Incluso permite ao Goberno vanagloriarse dunha actuación cuestionada desde todos os ámbitos.
