O BNG defende no Parlamento aplicar un Plan urxente de restauración mediombiental con dotación económica e tras a recuperación do Monte Pindo, declaralo Parque Natural
O alcalde de Carnota, Ramón Noceda xunto as deputadas, Ana Pontón e Tereixa Paz instaron á Xunta a declarar zona catastrófica os lugares afectados polo incendio iniciado en Carnota o pasado 11 de setembro e establecer as axudas necesarias para paliar os danos ocasionados.
Na comparecencia ante os medios de comunicación, a deputada Ana Pontón reclamou que a Xunta de Galiza actúe ante este grave desastre e active medidas urxentes para a recuperación de vivendas, e actividade agrícola así como evitar que as cinzas cheguen ao mar o que, ao seu xuízo, agravaría aínda máis a actividade pesqueira e marisqueira.
O BNG reclama medidas urxentes para recuperar a zona calcinada
Medidas para a recuperación da zona e sobre todo, do espazo de máis valor ecolóxico, dixo a deputada. No Monte Pindo, a Xunta debe asumir a súa responsabilidade e non repetir os erros do pasado. Neste sentido, referiuse a constante negativa do Goberno galego a declarar o Monte Pindo parque natural como solicitou durante anos o concello de Carnota, a Asociación do Monte Pindo e numerosas asociacións ecoloxistas galegas.
A xunta, afirmou, fixo oídos xordos durante todos estes anos e agora temos que lamentar a perda dun espazo de gran valor mediomabiental, simbólico e emocional.
Hai incendiarios e políticas incendiarias do Partido popular
Desta maneira pronunciouse Tereixa Paz para explicar que o problema dos incendios é de tipo estrutural e dunha inexistente política forestal para protexer o monte galego.
No caso do Monte Pindo, dixo, que ademais é un monte consorciado, a Xunta é responsable das tarefas de prevención con medidas específicas que, desgraciadamente, nin se contemplan nin se aplican.
Paz criticou as afirmacións de Feijóo sobre a exclusiva responsabalidade dos incendiarios e asegurou que a Xunta tenta distraer a atención cando a súa responsabilidade, dixo, é poñer en marcha unha política preventiva e de ordenación do espazo forestal, xa sabemos que o responsable é o que prende o lume reiterou, pero tamén o Partido popular aplica políticas incendiarias e a responsable de Medio Rural e o Presidente da Xunta non poden seguir con esta práctica de escaqueo flagrante.
O BNG pide rigor a Rosa Quintana e a Feijóo
Núñez Feijóo, engadiu, debería ser más rigoroso nas súas declaracións e repasar a memoria da Fiscalía Superior de Galiza que confirma que a proliferación dos incendios en Galiza débese aos recortes no dispositivo de loita contra o lume, a falta de prevención e tamén a falta de medios para investigar os incendios.
A deputada cualificou de solemne tonteria que Núñez Feijóo anuncie que a Xunta ser personará en todos os preitos penais contra incendios porque debería saber que a Fiscalía está personada como acusación en todos eles e na maioría dos casos, as persoas detidas non son culpables do incendio.
A parlamentaria pediu a Feijóo rigor e seriedade e que deixe de agocharse detrás dos incendiarios, o Partido popular, dixo, debe abandonar as políticas incendiarias e a política volcada no forestalismo salvaxe consistente na plantación de especies de crecemento rápido para que sigan crecemento grandes empresas.
Rabia, frustración e impotencia
Ramón Noceda, alcalde de Carnota asegurou na súa intervención sentir rabia e impotencia ante un incendio que non debera terse producido nunca tendo en conta, afirmou, que o concello pediu á Xunta de Galiza durante máis de tres anos a declaración de Parque natural do Monte Pindo.
O alcalde de Carnota explicou que non é a primeira vez que o concello sofre as consecuencias dun incendio como o ocorrido no ano 2006 ás que sumou as producidas pola catástrofe do Prestige, creo que a intención do incendio foi acabar coa posibilidade de ser declarado Parque Natural dixo, e anunciou que se a Xunta non adopta medidas para recuperar a zona, ímolo facer nós, na nosa nación hai suficiente conciencia como para tomar as rendas para recuperar o Monte Pindo.
Si a Xunta non se pon as pilas, sentenciou, o concello de Carnota tomará a iniciativa e se tod@s botamos unha man, ímolo conseguir, concluíu.