A deputada do BNG no Congreso, Rosana Pérez, explicou no pleno desta mañá o rexeitamento do BNG ao proxecto de lei do sector eléctrico, ao que as nacionalistas galegas lle presentaron emenda de totalidade.
Rosana Pérez afirmou que estamos ante un proxecto centralista e centralizador porque impide o deseño de políticas enerxéticas propias das CC.AA. De feito, o proxecto elimina o Réxime Especial, no que tiñan competencias e capacidade de actuar as CC.AA. É unha lei centralista que non contempla as diferentes aportacións ao sistema eléctrico desde o ámbito territorial e que impide a territorios excedentarios como o galego o desenvolvemento dunha política enerxética propia.
Ademáis, subliña, ábrese a porta a que CC.AA con impostos propios, como na Galiza á actividade de subministro eléctrico, paguen un suplemento territorial. Unha medida que discrimina ao territorio galego que soporta as instalacións de xeración e en lugar de estar recompensada polo impacto medioambiental, vai resultar prexudicada.
Galiza como excedentaria debería ter unha tarifa propia
Rosana Pérez demandou que non se impoña unha tarifa única para o Estado, senón que debe haber un prezo asociado á situación de territorio excedentario ou deficitario. Nese sentido, lembrou que Galiza é un territorio excedentario e debería ser compensada e ter un prezo propio.
Ademáis, a deputada do BNG fixo alusión á cuestións medioambientais porque o proxecto antenta contra o medio ambiente ao frear as enerxías renovábeis, ás que cada vez relega máis a unha posición secundaria, optando por incentivar aínda máis enerxías non limpas. Rosana Pérez puxo de manifesto que estamos ante unha lei non dialogada e o Goberno segue o mesmo guión doutras moitas leis. Non fala nin coas CC.AA nin coas axentes sociais, nin con ninguén.
Rosana Pérez acusou ao PP de querer só garantir a sostenibilidade económica e financeira do sistema eléctrico pero non se preocupa polos consumidores e usuarios porque non se contemplan medidas para garantir o servizo eléctrico ao menor custe posíbel. Ademáis, mantén as causas estruturais que provocan o défice tarifario e o mercado oligopolístico.
Subliñou que o problema do défice tarifario está no sistema de prezos: un sistema de xeración de prezos totalmente opaco e inxusto que xenera uns beneficios estraordinarios, chamados beneficios chovidos do ceo, aos axentes xeneradores de electricidade, sobre todo os das enerxías xa amortizadas como as hidroeléctricas ou a enerxía nuclear. Nese sentido, pediu ao Goberno que modifique a normativa sobre os prezos eléctricos.