O portavoz nacional, Xavier Vence, remitiu unha carta en nome do BNG ao embaixador israelí, Alon Bar, para reclamar o cese inmediato da masacre que está a perpetrar o Goberno de Benjamin Netanyahu sobre o pobo palestino e instando ao cumprimento das resolucións da ONU.
Como representante dunha forza que acredita no dereito de autodeterminación dos pobos, non podo deixar de transmitirlle a rabia e a dor que observo ao meu redor ante o que non pode máis que cualificarse como un crime de lesa humanidade do que terán que responder o Estado e o Goberno de Israel, denuncia Vence no escrito.
Cando comezo a escribir esta carta son máis de 200 as persoas asasinadas en Gaza nos últimos días polo exercito israelí, expón o dirixente nacionalista, a maior parte civís, como consecuencia das ansias imperialistas de Israel e da complicidade de moitos países occidentais.
A estratexia de aniquilación do pobo palestino non se limita a masacre dos últimos días, senón que a política xenocida practicada polo Estado de Israel, a base de detencións masivas, batidas policiais, asasinatos, destrución de casas e infraestruturas vitais para o pobo palestino.
Carta ao Parlamento galego
Na misiva, o portavoz nacional lembra a carta que Alon Bar dirixiu á presidenta do Parlamento galego na que criticaba a resolución unánime desta institución a prol do cumprimento das resolucións das Nacións Unidas para pór fin ao sometemento do pobo palestino e recoñecer os seus dereitos colectivos.
Quero hoxe reafirmar, en nome de toda a cidadanía galega solidaria co pobo palestino, ese acordo parlamentar que unicamente propoñía camiñar cara á resolución dun conflito desigual onde un Estado poderoso esmaga un pobo, asasina mulleres e crianzas e planifica a eliminación total de quen só pretende vivir dignamente na súa terra, recalca Vence.
O BNG en plena consonancia co desexo de milleiros de compatriotas, pide ao embaixador que manifeste publicamente a necesidade de que cesen de inmediato as hostilidades e ataques contra o pobo palestino, porque o respecto á dignidade humana non é compatíbel co escenario de asasinatos, de destrución, de xenocidio calculado que o Estado que vostede representa está a exercer de maneira sanguinaria.
En caso contrario, só caberá declaralo como persoa non grata pola súa incapacidade manifesta para se comprometer cos dereitos inalienábeis das persoas e dos pobos, conclúe.
Nota: adxuntamos texto da carta
