A portavoz do BNG no Congreso, Olaia Fernández Davila, subiu á tribuna da Cámara Baixa para deixar claro o voto en contra do BNG á convalidación do Real Decreto Lei 8/2014, de 4 de xullo, de aprobación de medidas urxentes para o crecemento, a competitividade e a eficiencia, que defendeu a Vicepresidenta Primeira do Goberno, Soraya Sáenz de Santamaría e pediu á Vicepresidenta a retirada do RD-Lei de imediato.
Davila dirixiuse a Soraya Sáenz de Santamaría para dicerlle que moi mal están as cousas. Está claro que estamos ante a campaña eleitoral e vostede ten que subir o tón de propaganda. Porque o que fixo hoxe é pura propaganda para vender un RD que non hai forma de explicalo. Un RD que non é máis que un obús contra democracia.
Acusou ao Goberno de lexislar de xeito antidemocrático cun Real Decreto lei que contempla a reforma de 26 leis en case todos os eidos ministeriais, consta de 176 páxina e aínda hoxe entregan en pleno debate 6 páxinas de correción de erros dun macro Real Decreto. Fronte aos demagóxicos anuncios de rexeneración democrática, asistimos a un xeito de goberna a golpe de Real Decreto Lei. Normas feitas ao ditado dos poderes económicos.
A portavoz do BNG salientou que nunca antes asistíramos a unha devaluación de institucións democráticas tan grave. Subliñou que o nexo común deste Real Decreto Lei é o favoritismo cara determinados lobbies coa introdución de novas normas económicas que lonxe de favorecer a competitividade, promove a concentración e o reforzo de oligopolios empresariais. Ademáis, concentración empresarial tamén vai á par dunha maior centralización económica e política, de xeito que os intereses de determinadas CC.AA se arrasan totalmente impedíndolles exercer políticas económicas proprias en función da súa estrutura económica.
Davila amosou o rexeitamento total do BNG a un Real Decreto Lei con medidas de privatización, de desmantelamento do sector público, ademáis de grandes agasallos a lobbies económicos e a empresas a amigas do PP.
Liberalización de horarios comerciais en A Coruña
En xeral con este Real Decreto Lei gañarán as grandes superficies, o oligopolio do gas, as grandes constructoras que se beneficiarán da privatización de AENA, a banca, perderán as maiorías sociais, o comercio local, as PEMES e os consumidores en xeral. Davila debullou algunhas das medidas normativas concretas recollidas no RD-Lei como a ampliación da liberalización de horarios comerciais que benefician ás grandes superficies en detrimento do comercio local. Reprochou ao Goberno de impór desde Madrid modelos comerciais sen contar coa consulta a concellos nin CC.AA, sendo ilustrativa a liberalización de horarios para o comercio de A Coruña imposta.
Privatización de AENA
Davila criticou a privatización de AENA, unha infraestrutura produto de investimentos públicos millonarios, incluso financiada con importantes sumas de fondos de cohesión e estruturais, que se pretende ceder a grandes infraestruturas.
Privatizacións dos Rexistos Civís
Olaia Fernández Davila aludiu tamén a outra das moitas medidas que van ter consecuencias moi negativas: a privatización dos Rexistos Civís mediante a decisión de traspasar a súa xestión a máns dos rexistradores mercantís e da propiedade.
Bonificacións ás empresas e uso fraudulento de fondos europeos
A deputada do BNG reprochou a Soraya Sáenz de Santamaría que no ámbito do emprego se adiquen a conceder bonificacións ás empresas nas cotas da Seguridade Social a cambio de contratos que poden suprimir cumpridos seis meses. Denunciou que isto supón un uso fraudulento dos 1.800 millóns de fondos europeos para crear emprego e valdeirar as arcas da Seguridade Social.
Privilexios para Gas Natural e para a banca
Acusou ao Goberno de facer unha modificación tributaria para o sector do gas para tapar un burato de 164 millóns de Gas Natural, o que significa socializar as perdas de empresas con grandes beneficios. No que atinxe á banca, subliñou que blindan á banca ante impostos das CC.AA aprobando unha taxa mínima do 0,003% aos depósitos das entidades.
A portavoz do BNG concluiu a súa intervención salientando a gravedade das formas. Preocúpannos as formas, pero a esta formación política teríalle gostado debater sobre o fondo pero vostedes nolo impiden.