O Consello Nacional aproba as candidaturas tras ser refrendadas polo 92% da militancia

Ana Pontón, Xosé Luís Rivas, Olalla Rodil, Noa Presas, Luis Bará

Ana Pontón, Xosé Luís Rivas, Olalla Rodil, Noa Presas, Luis Bará

O Consello Nacional do BNG aprobou as candidaturas ás eleccións galegas pechando o proceso previo de debate e votación nas asembleas comarcais celebradas ao longo das últimas semanas por todo o país. As listas presentada pola dirección sobre as propostas da militancia obtiveron un apoio do 92% por parte das bases, e foron aprobadas sen ningún voto en contra por parte do CN.

“Son os rostros da alternativa do BNG nas vindeiras eleccións, persoas comprometidas con capacidade para dar a cara por Galiza e para poñer por diante os intereses dos galegos e das galegas”, sintetizou a portavoz nacional e candidata á Presidencia, Ana Pontón, secundada polas cabezas de lista pola Coruña, Lugo, Ourense e Pontevedra, Xosé Luís Rivas, Mini, Olalla Rodil, Noa Presas e Luís Bará, respectivamente.

As candidaturas conxugan renovación e experiencia, con persoas de toda as idades e de todos os ámbitos profesionais e produtivos, desempregados ou precarizados, persoas implicadas na transformación dos concellos desde o traballo municipal, en plataformas en defensa da sanidade, do ensino, do feminismo, no ecoloxismo, comprometidas coa cultura e a lingua, na defensa de dereitos básicos e dos servizos públicos.

“En definitiva, apostamos por reflectir nas listas a Galiza de hoxe, comprometida para loitar polo futuro”, resumiu a portavoz nacional, “e dar unha alternativa ao desastre do PP”.

Pontón puxo en valor que o BNG ten os deberes feitos, tras ser a primeira forza política en elixir candidata á Xunta e en aprobar as candidaturas e toda vez que o programa electoral está moi avanzado.

“Non son tempos de mirarse o embigo senón de traballar para consolidar a alternativa nacionalista que precisa Galiza fronte ao desastre que nos deixa Feijóo”, alegou, porque “os galegos e as galegas viven peor hoxe que cando chegou á Presidencia”.

Á candidata nacionalista recoñeceulle ao actual mandatario dous grandes méritos: ter triplicado a débeda, “mentres nos dicía que non se pode gastar o que non se ten” e, como segundo gran logro, “ter sido capaz de facerlle máis dano ao país en sete anos que Fraga en 16”.

Consello Nacional BNG

Programa electoral

O BNG seguiu avanzando na elaboración do programa electoral, no que traballa desde fai semanas baixo a coordinación de Noa Presas e Nestor Rego desde a Executiva nacional, con contactos con colectivos de todos os sectores económicos, sociais e culturais para intercambiar propostas.

Un programa que Pontón definiu como “ambicioso” cun proxecto de país alternativo que se elabora baixo unha premisa inequívoca: a capacidade de Galiza para saír adiante e deixar atrás o desastre derivado das políticas da dereita e da UE.

Neste sentido, o Bloque presentará un programa electoral “para autoresponsabilizarnos do noso futuro”, cunha aposta pola innovación, polo talento, polo benestar, polos servizos públicos e pola igualdade, e por ter un novo status político que aporte ferramentas para sacar adiante os retos que ten Galiza.

Recoñecemento grupo parlamentario

O Consello Nacional fixo un recoñecemento expreso do traballo realizado polos sete deputados e deputadas do Grupo parlamentario, serio, solvente e moi rigoroso, dando alternativas e facendo un labor de control do Executivo. Co compromiso de todos e de todas para seguir aportando por fortalecer a alternativa do BNG desde novos ámbitos de traballo.

Pontón fixo unha mención específica do actual portavoz parlamentario, Francisco Jorquera, “o mellor deputado dos últimos tempos, unha persoa xenerosa, e para min un referente do que aprendín moito ao longo destes anos”, subliñou.

CANDIDATURA BNG ELECCIONS GALEGAS

Afíliate, faite do bloque
Anímate a dar o paso, súmate ao proxecto do BNG