O deputado Francisco Jorquera lembrou que a entidade financeira foi condenada a pagar as costas xudiciais como indemnización para a parte vencedora pero o Ministerio de Facenda obriga a que esa cantidade sexa integrada na base impoñible xeral
O parlamentario do BNG, Francisco Jorquera reclamou hoxe demandar do Goberno central non considerar como ganancia patrimonial as costas xudiciais aos afectados polas participacións preferentes tras ser condenada a entidade financeira a ese pago á parte vencedora.
Jorquera recalcou que esta non é unha cuestión menor xa que afecta a 15.000 persoas afectadas pola estafa das preferentes e que conseguiron recuperar os seus aforros por vía xudicial. Segundo os cálculos de Gestha (Sindicato de técnicos do Ministerio de Facenda), a reclamación pode ascender a 650 euros aos que hai que sumar outros 165 de multa. Primeiro foron estafados polas preferentes, dixo o nacionalista, e agora o Ministerio de Facenda volve a cebarse con eles.
O parlamentario cuestionou que gañar un preito poda ser considerado unha ganancia patrimonial polo que volveu reclamar que non sexa computado como tal. O deputado comparou o proceso das persoas afectadas polas preferentes coa dación de pago e explicou que o Ministerio de Facenda aplicou o mesmo criterio en ambos casos e a pesar da situación das persoas que se acolleron a dación de pago por unha situación económica desesperada e que nalgúns casos, fórenlle reclamados 10.000 euros por considerar que obtiveron unha ganancia patrimonial.
Acordo unánime na comisión de Economía
Tras a intervención da deputada do Partido popular, Maria Herminia Pouso Maneiro foi transacionado e votado por unanimidade un texto nos seguintes termos:
O Parlamento de Galicia: Insta á Xunta de Galicia a demandar da Administración Xeral do Estado a non consideración como ganancia patrimonial dos contribuíntes, as cantidades recoñecidas a favor destes , como consecuencia de terlle sido recoñecido o dereito ao abono das costas xudiciais pola parte perdedora nun xuízo, e particularmente no caso dos preferentistas en relación coas cantidades abonadas polas entidades financieiras como consecuencia de teren sido condenadas ao pago das costas xudiciais.
