A deputada cualificou de rutineira a programación da EGAP polo que solicitou da directora xeral volver a organizar e convocar bolsas de investigación e transparencia e equidade no acceso ás actividades formativas.
Tras a intervención da directora xeral da Escola Galega de Administración pública para presentar o Programa da Escola para o ano 2016, A parlamentaria do BNG, Tereixa Paz propuxo a emisión de bolsas de investigación para previr a corrupción, avaliación de áreas de risco de prácticas corruptas dentro da administración e deseñar medidas de impulso contra estras prácticas.
A deputada afirmou que a EGAP non pode ser unha institución que organice só cursos de formación e rexeitou a práctica rutineira na programación da escola polo que pediu volver ás actividades que garantan a homologación e acreditación do persoal entre o que destacou o de incendios tras entrar en vigor no Estado a Lei de Protección Civil. Sobre este extremo, a parlamentaria preguntou se a EGAP ten previsto sacar as prazas necesarias para a acreditación e formación profesional para as novas unidades competencias recollidas na lei 17/2015 atribuídas @s traballadores/as dos dispositivos de loita contra incendios forestais.
Tereixa Paz insistiu que a EGAP non pode ser unha mera academia, debe volver a organizar e convocar bolsas de investigación para crear coñecemento propio para aplicar na administración.
O BNG suspende a EGAP na formación contra a violencia de xénero e protección das persoas LGBTI
A nacionalista considerou que existe outro ámbito imprescindible para abordar a violencia de xénero e as políticas de Igualdade co fin de ampliar a súa eficacia. No noso país, dixo, temos a lei de Prevención da violencia de xénero e a lei do ano 2014 de visibilización e promoción da igualdade das persoas LGBTI. As dúas leis establecen que a administración galega debe profundizar nas causas que producen ese fenómeno pero tamén formar máis adecuadamente nese ámbito, formar ao conxunto da administración, xustiza, corpos de seguridade do Estado e no educativo, e neste ámbito, dende o BNG consideramos que vostede ten un suspenso rotundo.
Para a deputada, a EGAP tamén debe garantir a transparencia e a equidade no acceso ás actividades formativas polo que pediu que todas as actividades programadas sexan publicadas no DOG para evitar discrepancias e confusión nos prazos, lugar e créditos.
Tereixa Paz rematou a súa intervención retirando que se retomen as bolsas de investigación para dar contido a EGAP, máis alá dunha mera academia que imparte cursos aos empregados públicos porque 3,2M, explicou, deberían dar para algo máis co fin de eliminar a práctica rutineira da formación e establecer a transparencia e equidade para que o acceso á formación sexa óptima, concluíu.
