Estamos ante unha morte lenta pero segura e se morre o sector leiteiro morre o rural. Non o podemos consentir sen loitar, aseguraba o alcalde de Boimorto, Xosé Luís Rivas, Mini, nunha comparecencia ante os medios.
Como alcaldes e alcaldesas de concellos do rural estamos aquí porque queremos implicarnos na defensa do sector leiteiro, porque se trata de defender aos nosos veciños e veciñas. Non falamos en abstracto, non falamos desde os despachos, falamos de homes e mulleres, falamos da xente moza que vive nas parroquias e nas aldeas dos nosos concellos, que loitan cada día por sacar a súa explotación adiante, explicou, acompañado dos tamén rexedores de Mazaricos, Xosé Blanco, e de San Sadurniño, Secundino García.
Neste contexto, os rexedores nacionalistas do rural fixeron un chamamento en réxime de autoconvocatoria aberta a todos os alcaldes e alcaldesas dos concellos do medio rural sen distinción algunha de cor política, subliñou, para levantar unha plataforma en defensa do sector leiteiro e en defensa do rural. A cita, o luns 6 de xullo na casa da Cultura de Boimorto as 11:00 horas.
Sen condición previa algunha e sen distinción de cor político, reiterou, porque estamos falando de país e cando estamos falando de país, o resto sobra, alegou.
Igualmente, subliñaron que non vai ser unha plataforma allea a outras loitas, xa que a intención é estar a disposición do sector leiteiro para o que faga falta. Pero creemos que como institucións xogamos un papel complementario de calquera outra mobilización, indicou o alcalde de Boimorto.
Este chamamento é complementario pero temos algo que dicir como concellos, e estamos a favor de todo aquilo que nos aperte da senda do suicidio ao tempo que salientaba que ten que ser o municipalismo rural quen levante a última bandeira en defensa do sector, porque estamos nunha data crucial.
Prezos abusivos e problemas coa recollida
En igual sentido se pronunciou o alcalde de Mazaricos, Xoán Blanco, municipio que vive de xeito indirecto ou indirecto do sector gandeiro. Temos 360 explotacións gandeiras, se fallan as explotacións fallan os talleres, falla a hostalería, fallan as empresas de servizos, cando falla a gandería, cando falla o sector leiteiro falla todo, explicaba o rexedor, quen advertía que sen sector gandeiro un concello como Mazaricos de 4.200 habitantes pode reducir a súa poboación a 1.000 en dez anos.
Non seríamos capaces nin de manter os servizos básicos, alerta.
Desde os concellos temos unha responsabilidade directa, e podemos prestar apoio ante os abusos das industrias que poñen en perigo a explotacións que fixeron os deberes, que investiron e que son produtivas pero que non poden ca política de prezos abusivos da industria, argumenta Blanco.
Froito desa posición de forza da industria, en San Sadurniño a maior explotación tivo problemas de recollida, explicaba o alcalde Secundino García. A solución non pode vir por regalar o leite, a vinte céntimos, o que é moito por debaixo do prezo de custes, alegou.
Calquera alcalde de calquera cor política ten que estar preocupados e por iso dicimos, co municipalismo no corazón, xúntomenos e busquemos maneiras de axudar, concluíu o rexedor de Boimorto.
