O bipartidismo clásico, PP e PSOE, negáronse esta tarde a aprobar a admisión a trámite da proposición de lei do BNG que demandaba a transferencia da autoestrada AP-9 á Galiza.
Negáronse a pesar de que a proposición de lei do BNG recibiu o apoio dos demáis grupos parlamentares da Cámara: PNV, UPyD, Izquierda Plural e CIU. De novo é o bipartidismo de sempre o que obstaculiza unha necesidade para Galiza.
Rosana Pérez lembrou que o BNG trouxo ao Congreso en numerosas ocasións este tema, e algunhas veces foi aprobado aínda que nunca efectivizado, en alusión a febreiro de 2009 cando o Congreso aprobou unha moción do BNG neste sentido.
As contradicións de PP e PSOE
E isto, sinalou, a pesar de que tanto o PP como o PSOE, e despois de que o BNG o plantexou en numerosas ocasións, utilizárono como arma arroxadiza dependendo de quen estivese no Goberno central e no autonómico. Neste sentido, puxo de manifesto as contradicións do PP ao longo destes anos: o senador do PP por Lugo, Xosé Manuel Barreiro, solicitou o seu traspaso sendo Presidente Zapatero, e votando o PSOE en contra.
O Señor Feijoó pediullo a Touriño cando presidía a Xunta. Rosana Pérez concluiu que os dous grandes partidos dixeron que si e que non en función da cor das bancadas nas que senten en cada momento.
Denunciou que as peaxes non pararon de subir, igual que o deterioro do servizo. Explicou as innumerábeis queixas dos usuarios sobre o mal funcionamento da AP-9: desde a falla de iluminación ate a reposición do firme, desde a sinalización até as condicións das áreas de peaxe, ou a supresión do personal de cabinas. Reprochou ao Ministerio de Fomento que non garanta que a concesionaria cumpra coas obrigas do concesionario. Así, rememorou as colas interminábeis e os colapsos que se producen en período estival.
O Ministerio ao máximo que chega é a abrir un expediente informativo do que nunca soubemos as súas conclusións. Hai un notábel malestar polos reiterados incumprimentos e pola falla de medidas por parte do Ministerio, afirmou. Por iso, recalcou, é necesario superar estas situacións e xestionar desde Galiza a nosa principal infraestrutura viaria, e proceder á transferencia da competencia sobre o réxime xurídico da AP-9.
Lembrou que a AP-9 é a principal vía de comunicación de Galiza, que conecta o norte co sur, de Ferrol a Tui. É un eixe vertebrador fundamental para a comunicación interna de Galiza e con Portugal. Unha vía da que somos altamente dependentes e da que depende o desenvolvemento económico de Galiza. Ademáis, salientou o feito de que non conte cunha alternativa segura porque a N-550 presenta una grande deterioro en moitos tramos.
Baseou o traspaso no artigo 27.8 do Estatuto galego e no artigo 148.1.5ª da Constitución, ambos referidos a estradas cuxo percorrido é íntegro polo territorio galego. Desbotou o argumento clásico de que é unha vía de carácter internacional porque a conexión de Tui coa fronteira portuguesa faise através da A-55. Considerou lóxico que Galiza teña capacidade de decisión e de planificación das súas infraestruturas viarias, e ten máis lóxica aínda se poñemos enriba da mesa o dado do que Galiza está a pagar, máis de 3 millóns de euros anuais, e pagará até o 2048 no caso da AP-9.
Puxeron o interese xeral ao servizo de intereses privados
Fixo algo de historia ao lembrar o seu proceso de privatización no ano 2003, sendo Presidente Aznar. Un típico exemplo dun nefasto uso dos recursos públicos e de pór o interese xeral ao servizo das empresas privadas que fixeron un negocio redondo cos cartos de todos.
Destacou a rendabilidade desta infraestrutura para os seus compradores. Así, subliñou que desde o 2003 até o 2011, os seus beneficios foron de 463,55 millóns, a conta de aumentar desmesuradamente as peaxes.
Criticou a cicateira política de investimentos da concesionaria que se traduce en graves défices de prevención, seguridade e mantemento.
PP e PSOE
Chamou a atención a agresividade do grupo socialista na súa argumentación, centrada na Lei de Estradas e no carácter estatal da AP-9, defendendo en todo momento o seu mantemento en máns da Administración central.
Pola súa parte, o deputado popular, Celso Delgado, que tamén tildou a autoestrada de interese xeral , foise pola tanxente ao argumentar a falla de tempo porque a lexislatura chega ao seu fin ou derivando o seu debate a outros marcos lexislativos se é que o BNG considera que debe ter carácter autonómico.