A parlamentaria do BNG, Carme Adán aproveitou a comparecencia do director Xeral de Enerxía na presentación do Plan de aforro enerxético nas vivendas galegas, para reclamar medidas urxentes contra a pobreza enerxética en Galiza
A deputada do BNG, Carme Adán aproveitou hoxe a comparecencia do director Xeral de Enerxía, Bernardo Tahoces na Comisión de Industria para reclamar medidas concretas contra a pobreza enerxética en Galiza.
Na súa intervención, Adán lembrou que moitas familias afectadas pola imposibilidade de facer fronte a factura da electricidade non poderán tampouco acceder ao Plan de Aforro enerxético presentado hoxe no Parlamento por Tahoces polo que volveu reclamar do Goberno galego unha estratexia efectiva para erradicar a pobreza enerxética en Galiza.
Adán cualifica de fiasco a xestión do Goberno no eólico
As axudas publicitadas hoxe por Industria para aforrar enerxía nas vivendas, dixo a parlamentaria, deben ir acompañadas doutras explicacións da consellería como o grande fracaso do sector eólico por parte do Goberno galego. Levamos anos, remarcou , escoitando grandes frases despois de constatar o fiasco que o Goberno galego provocou no eólico.
A deputada tamén agardaba unha comparecencia con datos relativos á pobreza enerxética e a súa evolución, porque o aforro enerxético na vivenda galega no ano 2015 é un plan con medidas postas en marcha hai moitos anos polos diferentes gobernos e con distintas contías, por mandato europeo, para rematar coa pobreza enerxética.
O Plan de Aforro enerxético non presenta ningunha novidade
Unha parte do contido da súa comparecencia, afirmou, está recollido no Plan de Vivenda e Rehabilitación e a súa translación ás Comunidades Autónomas así como no Plan de eficiencia enerxética 2011-2020 e os diferentes Plans Renoves, polo tanto, vostede hoxe ven aquí a falarnos de medidas que xa coñecemos e que non representan ningunha novidade.
Cántas persoas e familias foron beneficiarias do tique enerxético?, unha medida, dixo, que supostamente acabaría coa pobreza enerxética ou cos problemas dos consumidores/as vulnerábeis?.
Non podemos esquecer que os malos equipamentos das vivendas provocan, en grande medida, escapes de enerxía sobre todo en zonas rurais e con moita humidade que causan graves problemas de saúde durante o inverno. O Plan presentado hoxe, volveu preguntar, chega a todos estes fogares?. Nós cremos que non, afirmou.
Fogares en pobreza enerxética non accederán ao Plan de aforro
Moitos fogares con pobreza enerxética, reiterou, non accederán ás subvencións e a aposta do Goberno pola biomasa tampouco resolve o problema, sentenciou a nacionalista.
Neste sentido, advertiu que a biomasa debe queimar só materia forestal residual pero non converter a Galiza nun gran cultivo enerxético porque sería un erro histórico.
Finalmente, a parlamentaria tamén preguntou ao director Xeral de Enerxía se o Plan de aforro non debería incluír o autoconsumo e lamentou que na sesión plenaria do Congreso o propio Rajoy respondera hoxe á deputada do BNG , Olaia Fernández Davila que non se aplicará unha tarifa eléctrica galega para non discriminar ao resto dos usuarios/as do Estado, a pesar de ser Galiza excedentaria de enerxía.
